«Memleket basshysy áleýmettik kásipkerlikti damytý máselesine basa mán berip otyr. Bul salanyń áleýeti zor. Birqatar damyǵan elderde áleýmettik nysandar ekonomıkaǵa aıtarlyqtaı oń áserin tıgizýde. Áleýmettik mańyzy bar jobalardy iske asyrý jáne áleýmettik kásipkerlerge qoldaý kórsetý – qoǵamnyń damý kórsetkishteriniń biri», dedi Senat Tóraǵasy.
Sonymen qatar Máýlen Áshimbaev Prezıdenttiń tapsyrmasyna sáıkes Parlament depýtattary áleýmettik kásipkerlik týraly zań jobasyn daıyndaǵanyn, ol qujat naýryz aıynda Senat qabyrǵasynda tanystyrylatynyn atap ótti.
«Zań jobasy Parlament depýtattarynyń bastamasymen ázirlendi. Bul – áleýmettik kásipkerlik týraly túsinik pen onyń negizgi mindetterin belgileıtin mańyzdy zań jobasy. Sondaı-aq, osy salany qoldaýdyń naqty tetikterin qalyptastyrady. Atap aıtqanda, depýtattar áleýmettik kásipkerlerge salyq jeńildikterin qarastyrýdy, olarǵa grant túrinde qarjylaı qoldaý kórsetýdi, nesıege jáne múlikti jalǵa alýǵa sýbsıdııalar berýdi usynyp otyr. Zań jobasy elimizdegi áleýmettik kásipkerlikke júıeli qoldaý kórsetýdi kózdeıdi», dedi Senat Spıkeri.
Kezdesý barysynda qazirgi tańda áleýmettik kásipkerler saýatty bıznes-jospar jazýda jáne ınvestorlar men áriptester tartýda túrli máselelerge tap bolatyny, olardyń marketıngtiń negizderin bile bermeıtini týraly da sóz boldy. Sondyqtan Máýlen Áshimbaev zań jobasynda bul máseleler eskerilip, sonyń nátıjesinde áleýmettik kásipkerlerdiń kásibı biliktiligin arttyratyn oqýlar uıymdastyrý, konsýltatıvtik, metodıkalyq jáne aqparattyq qoldaý kórsetý jumystary qarastyrylatynyn atap ótti.
Kezdesýde «Astana» halyqaralyq ýnıversıtetiniń prezıdenti Serik Irsalıev áleýmettik kásipkerlik salasy úshin mamandar daıarlaý máselesi jáne oqý ornynyń bazasynda ashylǵan «Áleýmettik ınnovasııalar habynyń» jumysy týraly aıtty. Onyń sózine qaraǵanda, Hab bazasynda áleýmettik máselelerdi sheshýge arnalǵan ınnovasııalyq jobalardy jetildirý jáne olardy iske asyrý jumystarymen birge áleýmettik kásipkerlik salasynda qoldanbaly zertteýler júrgiziledi. Odan bólek, Hab alańynda áleýmettik kásipkerler men áleýetti ınvestorlardyń jáne grant berýshilerdiń kezdesýleri uıymdastyrylady.
О́z sózinde Prezıdent janyndaǵy Ulttyq qoǵamdyq senim keńesiniń múshesi Emın Askerov múmkindigi shekteýli azamattardyń áleýmettik jáne qoldanbaly máselelerin sheshýge arnalǵan «Meıkaton» respýblıkalyq baıqaýy týraly aıtty. Aldaǵy ýaqytta baıqaýǵa qatysýshylar úshin qoıylatyn talaptardyń biri áleýmettik jobalar boıynsha bıznes-modelderdiń turaqtylyǵy men onyń kommersııalyq áleýetiniń mańyzdylyǵy bolmaq. Atalǵan baıqaýdy osy naýryz aıynda Nur-Sultan qalasy ákimdiginiń qoldaýymen ótkizý josparlanyp otyr.
Sondaı-aq, kezdesý kezinde áleýmettik kásipkerlik ókilderi salany damytýǵa qatysty óz oılarymen bólisip, birqatar naqty usynystaryn jetkizdi.
Sonymen qatar is-shara barysynda Máýlen Áshimbaev áleýmettik az qamtylǵan otbasylaryndaǵy daryndy balalarǵa arnalǵan Balalar shyǵarmashylyq mektebiniń ashylýyna qatysty. Bul jerde jetkinshekter tájirıbeli ustazdardan, belgili sýretshilerden jáne Qazaqstannyń eńbek sińirgen qaıratkerlerinen tálim alady. Ár toptyń 30 paıyzy kóp balaly otbasylaryndaǵy, ata-analary qutqarý operasııalarynda jáne quqyq qorǵaý salasyndaǵy qyzmet barysynda qaıtys bolǵan balalardan quralady.
Aıta keteıik, is-sharaǵa Premer-Mınıstrdiń orynbasary Eraly Toǵjanov, pen ózge de memlekettik qyzmet ókilderi, sondaı-aq, áleýmettik kásipkerlik salasynyń belsendileri qatysty.
