Is-shara ashylýynda sóz sóılegen A. Mýnesan men Elshi Qazaqstan táýelsizdik alǵan kezden bergi 30 jyl ishinde túrli salalarda, sondaı-aq Qazaqstan men Irannyń ekijaqty yntymaqtastyǵyn damytýda zor jetistikterge qol jetkizgenin atap ótti.
H. Hakshenas eki el arasyndaǵy óńiraralyq saýda-ekonomıkalyq, mádenı, týrıstik, emdik týrızm, zııarattyq baılanystardyń jaqsy damýda ekenine toqtaldy. Gúlstan provınsııasynda qazaq halqynyń tarıhı-mádenı eskertkishteri, ıaǵnı aqyn ári ǵalym Sultan Úbbi kesenesi (XII ǵasyr, Súleımen Baqyrǵanıdyń úshinshi uly), dinı ustaz ári ǵalym Shaǵurbattyń mazary (XVIII ǵasyr) jáne basqa qazaqtarǵa qatysty qasıetti oryndar zııarattyq týrızmdi damytýǵa jol ashady dep málimdedi. Provınsııa gýbernatory kóktemniń alǵashqy kúnderi ári eki elge ortaq Naýryz jańa jyl meıramy qarsańynda uıymdastyrylǵan «Qazaqstan – Iran mádenı kúnin» aldaǵy ýaqytta tıisti taqyryptaǵy aptalyq retinde jyl saıyn almakezek Mańǵystaý oblysy men Gúlstan provınsııasynda ótkizip turý jóninde usynys bildirdi. Bul usynysty Iran Mádenı mura mınıstri quptady.
Ǵ. Montezarı Qazaqstannyń táýelsizdik alǵanda ony alǵashqylardyń biri bolyp resmı tanyǵan Iranmen qarym-qatynastar barlyq salalarda jaqsy damýda, sonyń ishinde dástúrli mádenı baılanystardyń da tereńdegeniniń kýási bolyp otyrmyz, dep atap ótti.
Is-sharaǵa qatysýshylar Gorgan qalasynyń Ortalyq mádenıet úıiniń zaldarynda uıymdastyrylǵan jergilikti qazaq dıasporasy qolóner sheberleriniń ulttyq buıymdaryna arnalǵan kórmeni aralap, Qazaqstan Táýelsizdiginiń 30 jyldyǵyna arnalǵan foto jáne beıne materıaldarmen tanysty.
Sonymen qatar, jergilikti qazaq dıasporasy men ırandyq ónerpazdar qoıǵan konsertte ulttyq shaǵyn orkestr qazaq kúılerin tartyp, ánshiler qazaq jáne Iran halyq ánderin shyrqady.
