Jańa jobanyń tanystyrylymyna Aqparat jáne qoǵamdyq damý mınıstri Aıda Balaeva, «Samuryq-Qazyna» ulttyq ál-aýqat qory» AQ basqarma tóraǵasy Ahmetjan Esimov, «Qazaqtelekom» AQ basqarma tóraǵasy Qýanyshbek Esekeev jáne BAQ ókilderi qatysty.
– Jańa televızııalyq platformanyń ashylýy – otandyq medıa saladaǵy aıtýly oqıǵa. Qoǵamǵa sapaly ári ashyq aqparat jetkizý – bizdiń qyzmet salasyndaǵy basty mindetterdiń biri. Sonyń ishinde ásirese, jańa tele-platformanyń memlekettik tilge basymdyq beretini kóńil qýantady. Sondaı-aq jańa bastama – otandyq medıa salasynyń básekege qabiletin odan ári arttyrýǵa úlken serpin beredi dep senemin. Bul oraıda, osy jańa jobaǵa bastama kóterip, onyń iske asýyn qamtamasyz etip otyrǵan – «Samruq-Qazyna» ál-aýqat qory men «Kazaqtelekom» kompanııasyna alǵysymyzdy bildiremiz, – dedi A.Balaeva.
«Qazaqtelekomnyń» «TV+» televızııalyq platformasy zamanaýı IPTV/OTT gıbrıdti kesheni negizinde qurylǵan. Bul eki standart – IPTV jáne OTT ózara bólek qoldanǵan kezde de biregeı sapaly usynystardyń shoqtyǵyn usynatyn júıe. Al olardyń bir alańda toptasýy – abonentke ózindik, biregeı, ońtaıly televızııalyq paketti «óz qolymen» qurýǵa múmkindik beretin múldem jańa tehnologııaǵa aınaldy.
– «TV +» televızııalyq platformasyn bıylǵy qańtar aıynan beri qoldanyp kelemin. Paıdalanýshy retinde meniń zor qyzyǵýshylyǵymdy oıatty. О́te yńǵaıly, árdaıym qoljetimdi ekenine kóz jetkizdim. Saıasat, bıznes áleminde ne bolyp jatqanyn birden bilip otyrýǵa yńǵaıly. Ýaqtyly kóre almaı qalǵan baǵdarlamany qalaǵan jaǵdaıda qaıtalap kórýge qolaıly eken. Shetelde júrip te osy múmkinshilikterdi paıdalanýǵa bolady. Sondyqtan bul platformany óte qyzyqty dep sanaımyn, – deıdi A.Esimov.
Onyń aıtýynsha, «Samuryq-Qazyna» ulttyq ál-aýqat qory qazaqstandyq naryqta aldyńǵy qatarly ınfraqurylym qalyptastyrýǵa nıetti. «Qazaqtelekom» qyzmetiniń aıasynda osyndaı jahandyq jumys júrgizýge barlyq múmkindikter bar. Olar usynǵan ınfraqurylym negizinde bıznes pen óndiriske ǵana emes, jappaı tutynýshylarǵa da eń sapaly jáne zamanaýı ónimder usynylady. Sondaı-aq A.Esimov bul jańa joba qazaqstandyq mamandardyń kúshimen jasalǵanyn da erekshe atap ótti. «Bul joba – «Samuryq-Qazyna» qory tobyna kiretin kompanııalar búkil el kúndelikti qoldanatyn aýqymdy, joǵary tehnologııaly jáne tanymal sheshimderdi óz betinshe damyta alatyndyǵynyń dáleli», deıdi A.Esimov.
– «Qazaqtelekom» aksıonerlik qoǵamy televızııa álemine qadam basqanyna nebári 10 jyldyń júzi boldy. Solaı bola tura, biz belsendi damı bastadyq. Búginde biz osy saladaǵy iri oıynshylardyń biri sanalamyz. 860 myń abonentimiz bar. Sondyqtan osy jyly biz jańa jobany júzege asyrýdy maqsat tuttyq. Keıingi jarty jylda kóp jumys atqardyq. Aýqymdy daıyndyq jumystaryn qolǵa aldyq. Sondaı-aq «Qazaqtelekomnyń» ınfraqurylymyn jetildirý úshin sońǵy eki jyl boıy iri ınvestısııa tartyldy. Elbasy Nursultan Nazarbaevtyń bizge bergen tapsyrmalary da tııanaqty oryndaldy, – deıdi Q.Esekeev.
Máselen, 2018 jyly 12 qyrkúıekte «Qazaqtelekom» aksıonerlik qoǵamy respýblıkany sıfrlandyrý baǵdarlamasy aıasynda Sıfrlyq damý, ınnovasııalar jáne aeroǵarysh ónerkásibi mınıstrligimen birlesip shalǵaı jatqan aýyldardy keń jolaqty ınternetke qosý jobasy qolǵa alyndy. Joba aıasynda eki jarym jylda 14514 shaqyrym talshyqty-optıkalyq baılanys jelileri tóseldi. 828 eldi mekendegi 2496 memlekettik mekeme keń jolaqty, joǵary jyldamdyqty ınternetke, onlaın medısınaǵa, «TV+»-ke qol jetkizdi. Memlekettik mekemelerdiń arasynda eń aldymen mektepterge, aýrýhanalarǵa, ákimdikterge, polısııa pýnktterine, veterınarlyq klınıkalarǵa basa nazar aýdaryldy.
– Keıbir adamdardyń túsiniginde «Qazaqtelekom» – kontent jetkizetin «qubyr» degen uǵym qalyptasqan. Búgin biz osy qasań pikirdi joıǵymyz keledi. Biz bul jańa jobany uzaq tekserdik. Túrli synaqtan ótkizdik. Búginnen bastap óz ónimimizdi satylymǵa shyǵaramyz. Osylaısha, abonentterimizdiń qatary jyldam kóbeıedi degen senimdemiz. Shamamen bir jarym jyldyń kóleminde bizdiń televızııamyzdy tamashalaıtyn 1-1,5 mln abonentimiz bolady dep josparlap otyrmyz, – deıdi Q.Esekeev.
Bul televızııalyq platformaǵa «Qazaqstanda jasalǵan» aıdarymen otandyq fılmder men baǵdarlamalardyń da jıyntyǵy kiredi. Sondyqtan jańa platformanyń paıda bolýy – «Qazaqtelekomnyń» ǵana emes, sonymen qatar onyń kóptegen áleýetti seriktesiniń tarıhyndaǵy jańa kezeń deýge bolady.
«Qazaqtelekom» AQ Bólshek bıznes bóliminiń bas dırektory Igor Pogrebıskıı is-sharaǵa qatysýshylarǵa jańa ónimniń tehnıkalyq múmkindikterin tanystyrdy. Onyń aıtýynsha, dástúrli qyzmetterden aıyrmashylyǵy – «TV +» birqatar erekshe artyqshylyqtarǵa ıe. Máselen, kórermenniń efırdi óz betinshe basqara alý qabileti. Iаǵnı beınemagnıtofon sekildi fılmdi alǵa nemese keri aınaldyrý múmkindikteri qarastyrylǵan. Ekinshi mańyzdy artyqshylyǵy – teledıdar kórýge bolatyn gadjetti tańdaý múmkindigi. Iаǵnı smartfonnan, planshetten nemese Smart TV fýnksııasy bar teledıdardan kórý múmkindigi bar. Eń bastysy, úıde ınternet bolýy kerek.
– «TV+» jobasy arnanyń teledıdarlyq baǵdarlamasyna emes, kórermen qajettiligine saı beıimdeledi. Paıdalanýshynyń teledıdary eski úlgide bolsa da, STB prıstavkasyn paıdalaný arqyly tamashalaýǵa bolady. Kórermen neni paıdalansa da sapa tómendemeıdi (HD nemese 4K). Jańa jobaǵa qosylýdyń ýaqyty keldi, – deıdi I.Pogrebıskıı.
Aıta ketý kerek, «TV +» platformasynyń bar múmkindikterin «Qazaqtelekom» abonentteri ǵana emes, basqa operatorlardyń tutynýshylary da paıdalana alady. Internetke kirip nemese arnaıy qosymshany ornatyp, 170-ke jýyq arnany, myńdaǵan fılm men telehıkaıany kórýge bolady. Al mazmunnyń sapasy kez kelgen ınternet jyldamdyǵyna avtomatty túrde beıimdeledi. Tarıftik jospardyń quny aıyna 1700 teńgeden bastalady.
