Bilim jáne ǵylym mınıstri Ashat Aımaǵambetov, Nur-Sultan qalasynyń ákimi Altaı Kólginov, Qostanaı oblysynyń ákimi Arhımed Muhambetov, Jambyl oblysynyń ákimi Berdibek Saparbaev, Premer-Mınıstrdiń orynbasary Eraly Toǵjanov baıandama jasady.
«Nur Otan» partııasynyń saılaýaldy baǵdarlamasyn iske asyrý aıasynda bilim berý mazmunyn jańǵyrtý, onyń jańa ınfraqurylymyn qurý, pedagogtar men bilim alýshylardy áleýmettik qoldaý boıynsha sharalar ázirlendi.
2024 jylǵa qaraı pedagogtardyń jalaqysy men stýdentterdiń shákirtaqysy 2 esege ulǵaıady. 800 jańa mektep salynyp, 5000 aýyl mektebi jańǵyrtylady. Kolledjderde 9-synyp negizinde oqý tolyǵymen tegin bolady. Kolledjderdi bızneske senimdi basqarýǵa berý tájirıbesi jalǵasady (qazirgi ýaqytta 10 kolledj berildi). Ýnıversıtetterdiń bilim berý baǵdarlamalary kásiptik standarttar negizinde 100% jańartylady, bul túlekterdiń jumysqa ornalasý múmkindikterin arttyrady. Talantty jastardyń elden ketýin qysqartý maqsatynda shetel ýnıversıtetteriniń fılıaldaryn ashý josparlanýda. Otandyq 20 jetekshi JOO óńirlerdiń ósý nysanasyna aınalady.
Nazarbaev ýnıversıtetiniń tájirıbesi boıynsha ınnovasııalar men jańa tehnologııalardy damytýmen aınalysatyn eki ozyq JOO qurylatyn bolady. Joǵary bilimniń qoljetimdiligin arttyrý úshin 2025 jylǵa deıingi granttar sany 50%-ǵa artady. Jyl saıyn jas ǵalymdarǵa 1000 grant bólinedi, al 500 qazaqstandyq ǵalym álemniń tanymal ǵylymı ortalyqtarynda taǵylymdamadan óte alady.
Memleket basshysy Qasym-Jomart Toqaevtyń tapsyrmasy boıynsha osy jyldyń sáýir aıynda belgilengen úlgidegi qujattardy bere otyryp, qazaqstandyqtardyń óz betinshe oqý nátıjelerin tanýdy kózdeıtin Úzdiksiz bilim berý tujyrymdamasy qabyldanady.
Úkimet basshysy Bilim jáne ǵylym mınıstrligine 2021 jylǵy jeltoqsanǵa deıin mektepke deıingi bilim berýdi qarjylandyrýdyń vaýcherlik tetigin aprobasııalaýdy aıaqtaýdy jáne 2022 jyldan bastap onyń jappaı engizilýin qamtamasyz etýdi, osy jyldyń 1 sáýirine deıin álemdik praktıkada qabyldanǵan, balabaqshalardyń jumys sapasynyń kórsetkishterin («Starting well» reıtınginde) bekitip, engizýdi tapsyrdy. «Balabaqshalardyń jumysy ata-analardyń qanaǵattaný deńgeıin, balalardyń erte damý kórsetkishterin, tamaqtaný sapasyn, jurtshylyqtyń baǵasyn eskere otyryp baǵalanýy tıis», dedi A. Mamın.
О́ńirler ákimdikterine jeke balabaqshalar jelisin damytý esebinen 2021 jyly 32 myń orynǵa deıin mektepke deıingi bilim berý oryndaryn ashýdy qamtamasyz etý, 200 jańa mektepti paıdalanýǵa berý, sondaı-aq qalalyq jáne aýyldyq mektepterdegi oqytý jaǵdaılaryn teńestirý, onyń ishinde aýyldyq jerlerde joǵary bilikti pedagogtardy bekitý boıynsha naqty sharalar qabyldaý tapsyryldy. Bilim jáne ǵylym mınıstrligine, oblys ákimdikterine bıylǵy 25 naýryzǵa deıin 5 myń aýyl mektebin jaraqtandyrý, jóndeý, orta qaýipsizdigi jaǵdaılary, mektep jıhazdaryn jańartý, kitaphanalar men mektep ashanalaryn jańǵyrtý boıynsha naqty ındıkatorlary bar jańǵyrtý jónindegi jol kartasyn engizý tapsyryldy.
Úkimet basshysy bıyl kolledjderde kadrlar daıarlaýǵa arnalǵan memlekettik tapsyrysty 20 myń orynǵa ulǵaıtýdy, sondaı-aq 9 jáne 11-synyp túlekterimen aldyn ala kásiptik baǵdarlaý jumysyn júrgizýdi tapsyrdy. Bilim jáne ǵylym mınıstrligine 20 asa myqty JOO-ny iriktep, osy jyldyń 25 naýryzyna deıin Joǵary oqý oryndarynyń básekege qabilettiligi jónindegi keńestiń qaraýy úshin olardyń tizbesin Úkimetke engizý tapsyryldy.
«Bilim berý júıesin keshendi jańǵyrtý básekege qabiletti ekonomıkanyń negizgi faktory bolatyn sapaly adamı kapıtal qalyptastyrý úshin qajetti jaǵdaılar jasaýǵa múmkindik beredi», dedi A. Mamın.
