Qurmetti dostar!
Barshańyzdy Amal merekesimen, Kórisý kúnimen shyn júrekten quttyqtaımyn! Bul – eldiń yrys-yntymaǵyn arttyratyn aıryqsha meıram. Qystan aman shyqqan aǵaıynnyń bir-birimen kórisip, arqa-jarqa bolatyn sáti.
Memleket basshysy «Táýelsizdik bárinen qymbat» atty maqalasynda Naýryz meıramynyń mazmunyn odan ári baıytý kerektigin aıtqan edi. Osy turǵydan kelgende, Amaldyń mańyzy óte zor.
Elimizdiń batys óńirindegi aǵaıyn Ulystyń uly kúnin atap ótýdi dál osy Amal meıramynan bastaıtyny belgili. Qazirgi tańda atalǵan merekeniń jalpyulttyq sıpat alyp kele jatqany erekshe qýantady. Munyń bári tarıhı sanamyzdy jańǵyrtýǵa jáne ulttyq qundylyqtarymyzdy dáripteýge tyń serpin beretin ıgi ister ekeni sózsiz.
Endeshe kelip jetken jyl basy tek jaqsylyq pen qýanysh ákelsin. Halqymyzdyń berekesi artyp, birligi nyǵaıa bersin. Ár shańyraqqa shattyq pen amandyq tileımin. Amal qutty bolsyn, aǵaıyn!
