Memleket basshysy óz quqyǵyn paıdalanyp, jerdi sheteldikterge satýǵa jáne jalǵa berýge birjola tyıym salýdy kózdeıtin zań jobasyn Májiliske joldaǵany jón boldy. Osyndaı bastamanyń mańyzdylyǵy sol – Prezıdent usynǵan zań jobalary kezek kúttirmeı, jyldam ári tez qaralady.
Osy másele týraly Qasym-Jomart Toqaev Ulttyq senim keńesinde de aıtqan bolatyn. Alaıda óz basym jerdi jalǵa berý emes, satý máselesine ǵana shekteý qoıylatyn shyǵar dep oılap edim. Degenmen, Prezıdenttiń bul usynysy týraly estigende tipten razy boldym. Sebebi, satýǵa ǵana shekteý qoıylǵan jaǵdaıda lobbıster jalǵa alý máselesin de óz paıdalaryna sheship alýy ábden múmkin edi.
Túptep kelgende, Memleket basshysynyń bul sheshimi ulttyq qaýipsizdik máselelerimen tikeleı baılanysty. Jer sheteldikterge satylǵan, tipti jalǵa berilgen jaǵdaıdyń ózinde terrıtorııamyzdyń tutastyǵyna qaýip tónetin edi. О́ıtkeni, osyǵan deıin keıbir sheteldik fırmalar men kompanııalar bıznes júrgizemiz degen jeleýmen aldymen elimizge kirip alyp, keıin birtindep jalǵan tulǵalardyń atyn jamylyp jerge de, múlikke de aıla-sharǵysyn júrgizýge tyrysqany jaıly derekter bar. Zańger retinde osyndaı jaǵymsyz jaǵdaılardan da habardar bolýshy edim.
Sondyqtan Prezıdenttiń jerdi sheteldikterge satýǵa jáne jalǵa berýge birjola tyıym salýdy kózdeıtin zań jobasyn usynýy Táýelsizdikti tuǵyrly etý men terrıtorııamyzdyń tutastyǵyn saqtap qalý úshin asa mańyzdy. Osy másele zań júzinde sheshimin tapqannan keıin san soqtyratyn saldar men túrli qaýip birden seıiletinine senimdimin. Memleket basshysy osyndaı qadam arqyly qoǵamnyń kókeıinde júrgen máselege birjolata núkte qoıdy deýge de bolady.
Iаǵnı zań jobasy qabyldanǵannan keıin mundaı másele múlde týyndamaýǵa, tipti talqyǵa salyp kóterilmeýi tıis. Árıne, osyndaı qadamǵa barý ońaı bolmaǵanyn túsinemin. Alaıda Prezıdenttiń mundaı sheshimge kelgenin – «Halyq únine qulaq asatyn memleket» tujyrymdamasynyń júıeli júzege asyp jatqanynyń jarqyn kórinisi dep baǵalaýǵa bolady. Memleket basshysy aıtqandaı, ár ýaqytta ádildik, ashyqtyq, memlekettiń jaýapkershiligi bolýy kerek.
Marat BÁShIMOV,
Eýropalyq quqyq jáne adam quqyqtary ınstıtýtynyń dırektory
