Halyqaralyq dzıýdo federasııasynyń (IJF) erejesine sáıkes, jarys jeńimpazdary men júldegerlerine olımpıadalyq reıtıngte upaı úlestiriledi. Atap aıtqanda, jeńimpazdar 100 upaıǵa ıe bolsa, ekinshi orynǵa – 70, úshinshi orynǵa – 50 upaıdan qosylady.
IJF kúntizbesi boıynsha ótken básekede Halyqaralyq dzıýdo federasııasynyń jarys boıynsha dırektory Lısa Alan, Halyqaralyq dzıýdo federasııasynyń sporttyq komıssııanyń hatshysy Abdýllo Mýradov jáne Azııa dzıýdo odaǵynyń damý boıynsha dırektory Derakshan Mohammad qonaq bolyp, jarystyń uıymdastyrylýyn joǵary baǵalady.
«Halyqaralyq dzıýdo federasııasynyń jáne onyń prezıdenti Marıýs Vızerdiń atynan Turar Joldybaevty eske alýǵa arnalǵan Azııa dzıýdosyna qatysý biz úshin úlken mártebe. Biz Qazaqstan Ulttyq Olımpıadalyq komıtetine, Qazaqstan dzıýdo federasııasyna, Mańǵystaý oblystyq ákimshiligine, Mańǵystaý oblysynyń dzıýdo federasııasyna jáne jergilikti demeýshilerge osy is-sharany ótkizýge aıanbaı ter tógip, qoldaý kórsetkenderi úshin sheksiz alǵys aıtamyz. Jarysty joǵary dárejede ótýine kómektesken barlyǵyna kóp rahmet. Biz qazaq halqynyń, ásirese Aqtaý qalasynyń turǵyndarynyń erekshe qonaqjaılylyǵyn baǵalaımyz», dedi Halyqaralyq dzıýdo federasııasynyń jarys boıynsha dırektory Lısa Alan.
Azııa ashyq kýbogi Halyqaralyq dzıýdo federasııasynyń kúntizbesi boıynsha úshinshi jyl qatarynan uıymdastyrylyp otyr. Qazaqstan dzıýdo federasııasynyń bas hatshysy Ashat Jıtkeev bıylǵy jarystyń mańyzy zor ekenin atap ótti.
«О́zderińiz biletindeı, jyl ótken saıyn jarystyń dárejesi kóterilip kele jatyr. T.Joldybaevty eske alýǵa arnalǵan týrnır 2017 jyly tuńǵysh ret Azııa dzıýdo odaǵy aıasynda ótkizildi. Halyqaralyq mamandar tarapynan joǵary baǵalanǵandyqtan 2018 jyldan bastap halyqaralyq dzıýdo federasııasynyń kúntizbesine engizildi. Halyqaralyq dzıýdo federasııasy men Qazaqstan dzıýdo federasııasynyń, sondaı-aq, Mańǵystaý oblysy dzıýdo federasııasy tyǵyz-qarym qatynas ornatyp, yntymaqtastyqta atqarǵan jumysynyń arqasynda jarystyń mártebesi kóterildi. Jospar boıynsha, osy Azııa kýbogi dástúrli túrde jazda ótkiziletin. Reıtıngtik jarys bolǵandyqtan bıyl Olımpıadanyń aldynda ótkizýdi durys dep sheshtik. Jeńimpazdar men júldegerlerge olımpıadalyq reıtıngte upaı beriledi. Qazir kez kelgen sportshy úshin reıtıngtegi árbir upaı mańyzdy», dedi bas hatshy.
Sportshylar da bıylǵy básekeniń salmaǵy artqanyn jasyrmady. Azııa ashyq kýboginiń 2021 jylǵy jeńimpazy Maǵjan Shamshadın qarsylastarynyń osal bolmaǵanyn jetkizdi.
«Jasyratyny joq, biz bárimiz kúresti saǵynyp júrmiz. Pandemııa kezinde respýblıkalyq jarystar az, álemdik básekelerde Olımpıadaǵa lısenzııa tartysty ótip jatyr. Búgingi uıymdastyrylǵan báseke biz sııaqty jas sportshylar úshin sheberligin shyńdap, baq synaýǵa óte joǵary múmkindik boldy. О́zbekstan men Reseı quramalarynyń qarsylastary ońaı bolǵan joq. Qazaqstandyq sportshylar úshin Qazaqstannyń «Masters» týrnıri boldy. Álemdik «Masterste» reıtıngtegi úzdik 16 dzıýdoshy qatyssa, Qazaqstanda da solaı tek kil myqtylar jınaldy», deıdi Maǵjan.
Aıta keterligi, Maǵjan Shamshadın 60 kelige deıingi salmaqta 2020 jyldyń jeltoqsanynda Qazaqstan chempıonaty atanǵan.
