Dástúrli ulttyq óner mektebiniń negizgi maqsaty - elimizdiń tól óneri men mádenıetin damytý úshin júıeli jumys atqarý jáne dástúrli ónerdiń túrli salalaryn jan-jaqty jandandyryp, ony jastar arasynda keńinen nasıhattaýdy kózdeıdi. Dástúrli ulttyq óner mektebiniń negizgi maqsaty - elimizdiń tól óneri men mádenıetin damytý úshin júıeli jumys atqarý jáne dástúrli ónerdiń túrli salalaryn jan-jaqty jandandyryp, ony jastar arasynda keńinen nasıhattaýdy kózdeıdi.
Mekteptiń ashylý rásimine qatysqan qala basshysy qobyz, aıtys, shertpe kúı sekildi birqatar kabınetti aralap, tanysyp shyqty.
- Halyqtyq dástúrli óner - bul bizdiń mádenı muramyz. Ulttyq óner arqyly óskeleń urpaqtyń boıyna qazaqtyń dástúri men turmysyn, adamdyq minezin sińdire alamyz. Ata-babadan mıras bolǵan ulttyq bolmys pen ulttyq ónerdi umyt qaldyrmaýdyń bir joly – ony jastarǵa úıretý. Biz búgin eki tarıhtyń ortasynda turmyz. Bul mektepten keshegi Maılyqoja, Mádelideı aqyndar, Súgir men Tólegendeı kúıshiler, Táýshen men Áselhan apalarymyzdaı aıtysker qyzdar shyǵady dep úmittenemiz. Osyndaı úlken úmitpen senim artyp, jas kelse iske dep, mekteptiń tizginin óz uldaryńyz, ónerdiń ystyq-sýyǵynda ábden shyńdalǵan, ótkir tildi aıtysker aqyn, «Daryn» memlekettik jastar syılyǵynyń ıegeri Birjan Baıtýovqa tapsyrǵaly otyrmyn. Bul úlken jaýapkershilik. Eski ónerdi tiriltip, jańa zamanǵa alyp shyǵatyn, Qarataý ónerin jańǵyrtatyn, Shymkenttiń ǵana emes Qazaqtyń atyn álemge shyǵaratyn shákirtter shyǵýyna tilektespin, - dedi Murat Áıtenov.
Alǵashynda saz mektebi úshin josparlanyp salynǵanymen, keıinnen qala ákiminiń tapsyrmasy boıynsha dástúrli ulttyq óner mektebi bolyp qaıta jasaqtalǵan óner mektebi 10 baǵyt boıynsha jumys isteıdi. Atap aıtqanda, aqyndyq óner – aıtys, poezııa, ánshilik óner - dástúrli án, jyr-terme, kúıshilik óner – dombyra, qobyz, jetigen, sheshendik óner - kórkem sóz, kóshbasshylyq, akterlyq óner - sahna tili, kıno jáne teatr, bı óneri – ulttyq, klassıkalyq, qolóner - aǵash, bylǵary, toqyma, tiginshilik, beıneleý óneri - keskindeme, grafıka, kompozısııa, vokal – estrada, klassıka, fortepıano, solfedjıo, mýltıplıkasııa – anımasııa, kıno, rolık.
«Qarataý» dástúrli ulttyq óner mektebi Shymkent qalasy Beket batyr kóshesi, N5-úıde ornalasqan. Munda mektep jasyndaǵy balalar men jasóspirimder (6-17 jas aralyǵyndaǵy jasóspirimder men jastar) qabyldanady. Úıirmeler aqyly. Mektepti bitirýshilerge arnaıy kýálikter beriledi.
Is-shara barysynda qala ákimi búldirshinniń tusaýyn kesip, tilek dápterine jazba qaldyrdy.
