Qazirgi ýaqytta QR Ulttyq Banki Saýda jáne ıntegrasııa; Sıfrlyq damý, Innovasııalar jáne aeroǵarysh ónerkásibi; Eńbek jáne halyqty áleýmettik qorǵaý mınıstrlikterimen birlesip, Qazaqstanda áleýmettik ámııandy engizý máselesin pysyqtaýda.
Áleýmettik ámııan – bul bank kartasyna balama jáne onyń bankterde bar barlyq múmkindikteri bolady.
Áleýmettik ámııannyń artyqshylyǵy – ol Ulttyq bank júıesinde árbir qazaqstandyqqa JSN boıynsha ashylady. Shot ashý nemese bank kartasyn jańartý úshin (árbir 3 jyl saıyn) ekinshi deńgeıdegi bankterge turaqty túrde barý qajet bolmaıdy. Bul sondaı-aq ámııanǵa áleýmettik tólemderdi proaktıvti túrde esepteýge múmkindik beredi.
«Azamattarǵa áleýmettik tólemder men járdemaqylardyń qaıda esepteletinin tańdaý múmkindigi beriledi: áleýmettik ámııanǵa elektrondyq aqshamen nemese ádettegi tásilmen bank kartasyna aýdarý. Áleýmettik ámııannan óz qarajatyn bank kartasyna aýdarýǵa jáne ony ádettegideı paıdalanýǵa nemese qolma-qol aqshaǵa aınaldyrýǵa bolady», dep habarlady Eńbek jáne halyqty áleýmettik qorǵaý vıse-mınıstri Erbol Ospanov.
Áleýmettik ámııanǵa eseptelgen qarajat «Tólemder jáne tólem júıeleri týraly» Zańǵa sáıkes bankter, kollektorlar jáne salyq organdary tarapynan óndirip alýdan qorǵalatyn bolady.
Áleýmettik ámııan banktik tólem quraly retinde barlyq qaýipsizdik talaptaryna sáıkes keledi. Birinshi kezekte, paıdalanýshy tarapynan eki faktorly aýtentıfıkasııa júrgiziledi. Derbes derekterdiń qorǵalýy saqtaý, óńdeý deńgeıinde qamtamasyz etiledi. Ekinshi deńgeıdegi bankter men elektrondyq tólem júıelerine qoıylatyn qoldanystaǵy barlyq talaptar áleýmettik ámııanmen qamtamasyz etiletin bolady.
Ámııannan siz onlaın rejıminde tólem jasaı alasyz (mysaly, kommýnaldyq qyzmetter, telefon jáne t.b. úshin) nemese ony bank kartasyna baılap, kartany paıdalana alasyz. Azamat áleýmettik ámııandy, onyń ishinde qolma-qol aqshany paıdalaný kezinde eshqandaı kedergilerdi sezinbeıdi.
