Búginde kásiporyn 101 myńnan astam abonentke qyzmet kórsetedi. Mekemege 649 shaqyrym sý qubyry, 249 shaqyrym káriz júıesi jáne 97 uńǵyma qaraıdy. Teńgeriminde 75 avtokóligi bar. Jyldyq aınalymy 1,8 mıllıard teńge. Qazirgi kezde kásiporyn Eýropalyq Qaıta qurý jáne damý bankimen birlesip, oblys ortalyǵynyń sýmen jabdyqtaý jelilerin jańǵyrtý boıynsha bir mıllıard teńgeniń aýqymdy jobasyn júzege asyrýda. Biraq barlyq monopolıster sııaqty, atalǵan sý kompanııasy da tarıfterdiń tómendigine shaǵymdanady. Kompanııa ótken jyldy 283,7 mıllıon teńge shyǵynmen qorytyndylaǵan. Aldyńǵy jyly da osyndaı jaǵdaı oryn alǵan. Koronavırýs indetine baılanysty engizilgen tótenshe jaǵdaı jáne karantındik sharalar da óz áserin tıgizgen. Shyǵyndardy óteý men Eýropalyq Qaıta qurý jáne damý bankiniń aldyndaǵy mindettemelerdi oryndaý úshin oblystyq bıýdjetten 223 mıllıon teńge bólinse, aǵymdaǵy jyly taǵy 209 mıllıon teńge túsedi. Sý qubyrlarynyń tozýy 71 paıyz, káriz jelileriniń tozýy 43 paıyzdy quraıdy. Kásiporynda 609 adam jumys isteıtin bolsa, olardyń ortasha jalaqy kórsetkishteri 121,4 myń teńge kóleminde. Alaıda, Berdibek Saparbaev atalǵan kásiporynnyń jumysyna kóńili tolmaıtynyn aıtty. Tutynýshylardyń sý shyǵynyn, kásiporynnyń óz qarjysyn esepke alý jáne baqylaý jumystary oń jolǵa qoıylmaǵan. «Jambyl sý» únemi bıýdjet qarjysyna ıek artpaı, qosymsha qarjylandyrý kózderin izdestirý kerektigi de sóz boldy. Berdibek Saparbaev óziniń orynbasary Ulan Jazylbekke jumys tobyn quryp, eki apta ishinde Eýropalyq Qaıta qurý jáne damý banki qarajatynyń tıimdi jumsalýyn egjeı-tegjeıli zerdeleý tapsyrdy. Nátıjesi boıynsha tıisti sharalar qabyldanatyn bolady.
Sonymen qatar, jalpyúılik jáne jeke esepteý quraldaryn ornatý jaıy da sóz boldy. Mundaı qondyrǵymen barlyq úıler men páterler túgeldeı qamtylmaǵan. Sonyń saldarynan jyl saıynǵy sýdyń shyǵyn mólsheri 24 mıllıon tekshe metrge deıin jetýde. Shtat sany boıynsha da suraqtar týyndady. Mıllıon halqy bar Shymkent qalasyndaǵy osyndaı kásiporynda 790 adam qyzmet etedi eken. «Ákimshilik-basqarýshylyq apparatta 50 shaqty qyzmetker jumys isteıdi. Al, dırektordyń tórt orynbasary bar. Bul tym kóp emes pe? Sonymen qatar, káriz qaldyqtarymen jumys isteýge týra keletin qarapaıym jumysshylardyń jalaqysy úsh myń teńgege ǵana ósken. Bul rette ınflıasııa men basqa da sebepterdi eskere otyryp, jalaqy jyl saıyn keminde 10 paıyzǵa ósýi tıis. Sizder tarıfter tómen dep aıtasyzdar. Biraq basqa kásiporyndar da osyndaı jaǵdaıda jumys isteýde, soǵan sáıkes qosymsha rezervter izdeýge tyrysady. Pandemııa kezinde sý men basqa da kommýnaldyq qyzmetterdiń qymbattaýy týraly másele týyndaýy múmkin emes. Sonymen qatar, ár páterde eseptegish quraldary bolýy tıis búgingideı kezde 70 kontroller ustaý asa kóp emes pe? Olarǵa jumsalǵan qarjyny tıimdi paıdalana otyryp, basqa baǵytta qoldanǵan durys shyǵar. Máselen, sol jalpyúılik jáne jeke sý eseptegishteriniń keńinen ornatylýyna baqylaýdy júzege asyrý kerek», dedi ákim. Sondaı-aq, Berdibek Saparbaev apattyq jaǵdaılar jıi oryn alatyn qaraýsyz jelilerdi teńgerimge alýǵa kóńil bóldi. Iesi joq bolǵandyqtan, olar baqylaýsyz qalýda. Sonymen qatar, oblys ákimi kásiporyndaǵy baqylaý men esep júrgizý jumystarynyń álsizdigin de atap ótti. Sý qubyrlaryn aýystyrýdyń orta merzimdi josparyn jasaýdy, qaraýsyz sý qubyrlarynyń ıelerin anyqtaýdy tapsyrdy. Qajet bolǵan jaǵdaıda, tıisti basshylarǵa máseleni sot arqyly sheshýdi júktedi.
