Osyǵan oraı Memleket basshysy Qasym-Jomart Toqaev qazaqstandyq Imanbek Zeıkenovke asa bedeldi Grammy mýzykalyq syılyǵynyń tabys etilýi jónindegi jańalyqty zor qýanyshpen qabyldady. Bul týraly Prezıdenttiń baspasóz hatshysy Berik Ýálı óziniń Facebook paraqshasynda jazdy. «О́ziniń talanty men maqsat qoıa bilýiniń arqasynda dıdjeı Imanbek álemdik shoý-bıznestiń basty syılyqtarynyń birin ıelendi. Onyń shyǵarmashylyǵy qazaqstandyq jastardyń da eń bıik shyńdardy baǵyndyra alatynyn dáleldedi. Prezıdenttiń atynan Imanbekti osy jarqyn jeńisimen quttyqtaımyn jáne jańa shyǵarmashylyq tabystar tileımin!», delingen jazbada.
Eske sala keteıik, «Egemen Qazaqstan» gazeti alǵashqylardyń biri bolyp jas ónerpazdyń darynyna erekshe qyzyǵýshylyq bildirip, ún qosqany, 2020 jyldyń 18 qyrkúıektegi sanynda «Imanbektiń ıirimderi» atty maqala jaryq kórgeni oqyrmandardyń esinde bolar.
Keshegi súıinshi jańalyq atalǵan syılyqtyń Twitter paraqshasynda habarlandy. 21 jastaǵy tanymal reper 63-ret uıymdastyrylǵan Grammy júldesi úshin baq synasqan tórt úmitkerdiń ishinen qara úzip shyqqan. Syılyqty alǵan sátinde ol eń aldymen ata-anasyna, komandasyna, menedjerine jáne Grammy qazylaryna alǵysyn jetkizedi. О́z jazbasynda: «Ár mýzykanttyń shyǵarmashylyq jolyndaǵy eń keremet sát – Grammy syılyǵyn ıelený. Biz osy jetistikke qol jetkizdik», dedi mýzykant.
Jýyrda kópshilikke dıdjeı retinde tanylǵan jerlesimiz Imanbek Rita Ora jáne David Guetta sııaqty álemge áıgili mýzykanttarmen birge án jazǵan bolatyn. О́ziniń aıtýynsha, ol án árleýdi jergilikti dıdjeıler men prodıýserlerden jáne Youtube jelisindegi vıdeosabaqtardan úırengen.
2019 jyly Imanbek reper Saint Jhn-nyń Roses degen ánin baıqap, ony bıleýge yqshamdap remıks jasaǵan. Remıks óte jyldam qarqynmen tanymal bola bastady. Dúnıe júzindegi birshama charttarda boldy. Remıks YouTube-te 145 mıllıonnan asa qaralym jınaǵan.
The New York Times basylymyna suhbat bergen Imanbek ata-anasymen birge Pavlodar oblysyna qarasty Aqsý qalasynda turady.
Keıingi jyldary án óneri men kıno salasyndaǵy el talanttary álemdik arenada jıi top jaryp júr. Asqaq únimen jer-jahandy tamsandyrǵan álemdegi eń tanymal qazaqstandyq Dımashtyń ózi bir tóbe. Kann kınofestıvalinde eń úzdik áıel róli úshin marapattalǵan Samal Eslıamovanyń juldyzdy jeńisin de umyta qoıǵan joqpyz. Qazaq óneriniń deńgeıin kóterip, mártebesin asyratyn ónerpazdar kóp bolsyn deımiz.
