Múgedektigi bar balalardyń analary birqatar problema men usynysty aıtty. Atap aıtqanda, áıelderdi múgedektigi bar bala kútimi boıynsha járdemaqymen birge asyraýshysynan aıyrylý boıynsha járdemaqy tóleý múmkindigin qaraý máselesi alańdatty.
Bul máseleniń sheshimi Parlament Májilisiniń qaraýynda jatqan «Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasynda kórinis tapty.
«Bul asyraýshysynan aıyrylǵan jáne quramynda múgedek balalary bar otbasylardyń tabys deńgeıin arttyrýǵa múmkindik beredi. Osy normany engizgen kezde 2 myń bala múgedektigi boıynsha járdemaqymen qatar asyraýshysynan aırylý jaǵdaıy boıynsha járdemaqy ala alady. Qazirgi ýaqytta tańdaý boıynsha járdemaqynyń bir túri ǵana beriledi», dep atap ótti Erlan Áýkenov.
Sondaı-aq mamandandyrylǵan ortalyqtarda balalardy ońaltý týraly másele qozǵaldy. Búgingi kúni Qazaqstanda halyqty áleýmettik qorǵaý salasynda 40 ońaltý ortalyǵy jumys isteıdi, onyń ishinde 2020 jyly Eńbek jáne halyqty áleýmettik qorǵaý mınıstrliginiń bastamasymen 12 jańa ortalyq ashyldy. Eńbekmıni 2025 jylǵa deıin olardyń sanyn 2 esege arttyrýdy josparlap otyr.
Qazaqstanda erekshe qajettilikteri bar adamdarǵa túrli áleýmettik qoldaý sharalary kórsetiletinin atap ótken jón. Atap aıtqanda, múgedektigi bar bala tárbıelep otyrǵan azamattarǵa aı saıynǵy járdemaqy, bala kezinen I toptaǵy múgedekke kútim jasaý boıynsha aı saıynǵy járdemaqy tólenedi. Ońaltýdyń tehnıkalyq quraldarynyń 55 túrin (67 túrlerin eskere otyryp), jeke kómekshilerdiń qyzmetterin, sanatorlyq-kýrorttyq emdeý, qalalyq qoǵamdyq kólikte tegin júrý jáne ınvataksı qyzmetterin alý múmkindigi bar. Múgedektigi bar adamdarǵa (I, II toptaǵy) birjolǵy aqshalaı tólemder, tis protezdeý qyzmetteri, qatty otyn satyp alýǵa áleýmettik kómek jáne t. b. usynylady.
