Koronavırýs indeti tek Qazaqstandy ǵana emes, dúnıejúzin áleýmettik-ekonomıkalyq daǵdarysqa ushyratty. Elimiz osy qaterli derttiń saldary aýyr bolatynyn alǵashqylardyń biri bolyp túsinip, der kezinde tıisti sharalar qabyldady.
Memleket basshysy koronavırýs indetimen kúres kezinde, eń aldymen, halyqtyń densaýlyǵyn qorǵaý, ekonomıkanyń turaqtylyǵy men damý qarqynyn saqtaý, bilim berý salalaryna basa mán berdi. Atap aıtqanda 4,5 mıllıonnan astam adamǵa 42500 teńge kóleminde qarjylaı kómek kórsetildi. 1 mıllıonnan astam azamatqa azyq-túlik pen turmystyq zattar úlestirildi. 2 mıllıonǵa jýyq adamnyń nesıe tóleý merzimi keıinge shegerildi. 700 myńnan astam kompanııa men kásipkerlerdiń salyq júktemesi azaıtyldy. Jalpy Qazaqstan Prezıdentiniń tapsyrmasymen qurylǵan Tótenshe jaǵdaı jónindegi memlekettik komıssııa 500-ge jýyq mańyzdy sheshimderdi iske asyrdy.
Qasym-Jomart Toqaev pandemııa qaýpine qaramastan, óńirlerde qalyptasqan ahýaldy óz kózimen kórip, indetke qarsy kúresip jatqan jurtshylyqpen júzbe-júz kezdesip, oblystardyń áleýmettik-ekonomıkalyq damý barysymen tanysý úshin Jambyl, Aqmola, Túrkistan, Qostanaı, Soltústik Qazaqstan, Almaty, Shyǵys Qazaqstan, Qaraǵandy oblystaryna jumys saparymen bardy. Ár aımaqtyń ózine tán erekshelikterine baılanysty atqarylyp jatqan jumystarmen tanysyp, aýyl sharýashylyǵy men ónerkásipti órkendetý úshin ınvestısııa tartý, túıtkildi máselelerdi sheshý jóninde tapsyrmalar berdi.
Koronavırýs pandemııasy Qazaqstannyń halyqaralyq qatynastaryna da aıtarlyqtaı áser etti. Soǵan qaramastan, josparlanǵan álemdik deńgeıdegi jıyndardy onlaın rejımde ótkizý formaty qoldanysqa engizildi.
Atap aıtqanda, Qasym-Jomart Kemeluly BUU-nyń 75 jyldyǵyna arnalǵan Joǵary deńgeıdegi is-sharaǵa, BUU Bas Assambleıasy 75-sessııasynyń jalpysaıası debattaryna, TMD memleketteri basshylary keńesiniń otyrysyna, Shanhaı Yntymaqtastyq Uıymyna múshe memleketter basshylary keńesiniń otyrysyna, Túrkitildes memleketterdiń yntymaqtastyǵy keńesiniń tótenshe sammıtine, Eýrazııalyq ekonomıkalyq odaqtyń sammıtine, Ujymdyq qaýipsizdik shart uıymynyń sammıtine jáne basqa da jıyndarǵa vıdeo baılanys rejıminde qatysty. Osy jıyndarda Qazaqstannyń halyqaralyq qaýipsizdikti nyǵaıtýǵa, jahandyq jáne óńirlik baılanystardy damytýǵa beıil ekenin aıtty.
Jalpy Memleket basshysy byltyrǵy 16 naýryzdaǵy televızııalyq úndeýinen bastap bir jyl ishinde aýqymdy jumys atqardy. Osyǵan baılanysty Prezıdenttiń Baspasóz qyzmeti bıyl da dástúrli túrde Qasym-Jomart Kemelulynyń óńirlerge jasaǵan jumys saparlarynyń barysynda, túrli jıyndarda sóılegen sózderin, Úndeýleri men Málimdemelerin otandyq jáne sheteldik buqaralyq aqparat quraldary ókilderine bergen suhbattary men ártúrli basylymdarda jarııalanǵan maqalalaryn úsh kitapqa toptastyryp shyǵaryp otyr.
Birinshi jáne ekinshi kitapqa Qasym-Jomart Toqaevtyń COVID-19 pandemııasyn eńserip, elimizdiń ekonomıkalyq ósimin qaıta qalpyna keltirý maqsatymen qolǵa alǵan bastamalary, halyqtyń ál-aýqatyn jaqsartý úshin memlekettiń aldynda turǵan mindetter jónindegi tushymdy oı-pikirleri, sondaı-aq álemdik mańyzy zor halyqaralyq jıyndarda sóılegen sózderi toptastyrylǵan.
Úshinshi kitapqa Memleket basshysynyń otandyq jáne sheteldik buqaralyq aqparat quraldarynda jarııalanǵan maqalalary men suhbattary toptastyrylǵan. Kitapta Qazaqstannyń halyqaralyq qatynastarǵa qatysty ustanymy, Prezıdenttiń el ishindegi ózekti máselelerge qatysty oı-tolǵamdary sóz bolady.
Prezıdenttiń Baspasóz qyzmeti oqyrman qaýymǵa Qasym-Jomart Kemelulynyń bir jylda atqarǵan jumystarynyń jalpy qorytyndysy retinde osy 3 tomdyqty usynyp otyr. Jınaqqa Memleket basshysynyń qatysýymen ótken jıyndardyń fotosýretteri de engen. Kitapta jarııalanǵan materıaldar jas izdenýshilerge, memlekettik mekemelerde eńbek etip jatqan qyzmetshilerge qundy ári derekti qujat bolmaq.
