Foto: Aqorda
Qazaqstan Prezıdenti dástúrli qonaqjaılyq tanytqan Vladımır Pýtınge alǵys aıtyp, Reseı halqyn Uly Jeńistiń 81 jyldyǵymen quttyqtady.
– Uly Jeńis merekesi qarsańynda Sizben Máskeýde júzdeskenime qýanyshtymyn. Bul «kózimiz jasqa tolyp» qarsy alatyn mereke. О́ıtkeni adamzat tarıhyndaǵy eń qanquıly soǵysta opat bolǵan batyrlarymyzdyń rýhyna taǵzym etemiz. Keńes ókimeti Uly Otan soǵysynda fashızmdi jeńip, Ekinshi dúnıejúzilik soǵystan alpaýyt el bolyp shyqty. Birikken Ulttar uıymyn qurýshylardyń birine aınaldy. Biz muny eshqashan umytpaımyz. Ardagerlerimizdi ardaq tutamyz. Qazaqstanda soǵysqa qatysqan kózi tiri 57 maıdanger qaldy, – dedi Memleket basshysy.
Prezıdent eki eldiń san qyrly yqpaldastyǵy jyl ótken saıyn artyp, barlyq baǵyt boıynsha qarqyndy damyp kele jatqanyn atap ótti.
– Elderimiz arasyndaǵy yntymaqtastyqqa keler bolsaq, Sizdiń mamyr aıynyń sońyna josparlanǵan memlekettik saparyńyzǵa qyzý daıyndalyp jatyrmyz. Sońǵy bes jyldyń qorytyndysy boıynsha, Reseı – qazaq ekonomıkasynyń eń basty ınvestorlarynyń biri. Saýda-sattyq ta tabysty damyp keledi. Aldyn ala boljamǵa sáıkes, bıyl taýar aınalymy 30 mıllıard dollar mejesinen asyp túsedi. Bul – óte jaqsy kórsetkish. Eki eldiń bilim berý salasyndaǵy gýmanıtarlyq baılanystaryna aıryqsha toqtalsaq, «Sırıýs» mektepteri Astana, Almaty jáne basqa da qalalarda ashylyp, jumys isteı bastady. Týrızm de óte mańyzdy baǵyt. Byltyr Qazaqstanǵa saıahattap kelgen týrısterdiń sany jaǵynan Reseı birinshi orynǵa shyqty, – dedi Qasym-Jomart Toqaev.
Memleket basshysy aldaǵy Joǵary Eýrazııalyq ekonomıkalyq keńestiń kezekti sammıti tabysty ótetinine senim bildirdi. Sondaı-aq Reseı Prezıdentiniń Qazaqstanǵa memlekettik sapary saıası jáne tarıhı turǵydan mańyzdy ýaqıǵa bolatynyna nazar aýdardy.
Vladımır Pýtın Qasym-Jomart Toqaevtyń eki memleket arasyndaǵy qarym-qatynasty damytýǵa eleýli úles qosyp otyrǵanyn jetkizdi.
– Shyn máninde, bul qos halyq pen biz úshin eń basty mereke deýge bolady. Sizdiń Máskeýge kelýge ýaqyt taýyp, osy kúnderi bizben birge bolǵanyńyz Reseı Federasııasy men Qazaqstan arasyndaǵy yntymaqtastyqtyń qandaı deńgeıde ekenin naqty kórsetedi. Munyń barlyǵy, kóp jaǵdaıda Sizdiń memleketaralyq baılanystardyń damýyna qosqan úlesińizdiń arqasynda júzege asyp jatyr, – dedi Reseı Prezıdenti.
Kezdesý barysynda memleketter basshylary óńirlik jáne halyqaralyq máseleler jóninde pikir almasty.
