«Qurylysy uzaqqa sozylǵan nysandar qalanyń estetıkalyq kelbetin buzady, jańa nysandardy salý kezinde de belgili problemalar týǵyzady. Árbir nysannyń óz tarıhy bar, bul - adamdardyń taǵdyry. Osy jyldar ishinde páterin kútip júrgen úleskerlerdiń balalary ósti, nemereleri paıda boldy, ókinishke qaraı, páterin kórmeı ketkenderi de bar.
Memleket basshylyǵynyń tapsyrmasyna sáıkes úlestik qurylys obektilerin aıaqtaý boıynsha júıeli ári aýqymdy jumystar júrgizýdemiz. Osyndaı nysannyń biri - «Shyǵys». Qurylysy uzaqqa sozylǵan «Shyǵys» turǵyn úı kesheni birneshe toptan turady. Úleskerlerdiń jalpy sany - 2 myńnan astam otbasy. Búgin osy nysanǵa bardym. Bul - «Shyǵys» tobynyń 1A, 1V, 2A, 2V, 3A, 3B, 4A (birinshi kezegi) bloktary.
Barlyq bloktarǵa qarjy bólindi, qarjylyq jáne tehnıkalyq aýdıt júrgizildi. Tehaýdıt qaýipsizdikti qamtamasyz etý úshin óte mańyzdy: úıdiń irgetasy men jaqtaýynyń beriktigin tekserý qajet boldy jáne t. b. Barlyq bloktar boıynsha merdigerler anyqtaldy.
Mysaly, 1A jáne 1V bloktarynda qasbettik jumystar júrgizildi, lıftiler men terezeler ornatyldy. Injenerlik jeliler júrgizildi. Jumysshylar ishki bezendirýge kiristi.
2A jáne 2V bloktarynda úıdiń jaqtaýy kóterildi. Sondaı-aq, shatyr salý jumystary aıaqtaldy. Qazir terezeler men lıftiler ornatylyp jatyr.
3A jáne 3B bloktarynda úıdiń qańqasy men shatyry boıynsha uqsas jumystar júrgizildi. Lıftiler men terezeler ornatylady. 4A blogynda (1 kezek) monolıtti jumystar júrgizilip jatyr.
Qurylys jumystaryn aıaqtap, buryn atalǵan turǵyn úı bloktaryn bıyl paıdalanýǵa berýdi josparlap otyrmyz. Bir jarym jyl ishinde (2019 jyldyń jazynan bastap) qurylysy uzaqqa sozylǵan nysandar sanyn 2 esege azaıttyq. Bıyl taǵy 7 myńǵa jýyq úleskerge baspana beriledi. Úlestik qurylystyń árbir obektisi boıynsha qadamdyq is-sharalar jospary jasaldy», dep jazdy qala ákimi.
