«Shalqar kóliniń túbin tazartý jumystaryna sý mamandary men sarapshylardy tarttyq. Byltyr jobalyq-smetalyq qujattamany ázirleý jumystary aıaqtalǵan bolatyn. Úkimet atalmysh jobany qoldap, bıyl ony júzege asyra bastaımyz. Aýqymdy joba úsh jylǵa josparlanǵanymen, jumysty yjdaǵattap, eki jylda aıaqtaýǵa bolady. Kóldi qalpyna keltirý jumystarynyń rekreasııalyq jáne sharýashylyq turǵydan ózektiligin aıtpaǵannyń ózinde, aımaq ekologııasy úshin mańyzdylyǵy zor», dep atap ótti jıynda oblys ákimi Ońdasyn Orazalın.
Shalqar aýdany turǵyndary arnasy jyldan-jyldan azaıyp bara jatqan Shalqar kóliniń túbin tazartý máselesin birneshe jyldan beri kóterip júr. О́tken jyldyń sońynda Senat depýtattary kóldi qalpyna keltirýdiń aımaq ekologııasy úshin ózektiligin maquldap, respýblıkalyq bıýdjetten 3 mıllıard teńge bólýge yqpal etti. Depýtattardyń jedel is-qımylynyń arqasynda bıylǵy jyldyń basynda 432,95 mln teńge kóleminde alǵashqy transh bólindi.
Aıta ketý kerek, Shalqar kóli túbiniń tartylyp, batpaqtanýy 1990-shy jyldardyń bas kezinde bastaldy. Oǵan jylma-jyl kóktemde kólge quıylatyn sý mólsheriniń azaıýy da sebepshi boldy. Sarapshylar bir-birimen jalǵasqan úlken jáne kishi Shalqar kólderiniń tartylý sebepterin aǵyndy sýlardyń azdyǵynan, sý ústi jáne sý asty ósimdikteri kóbeıýinen bulaq kózderiniń bitelip, sý sapasynyń nasharlaýynan kóredi. Bastaýyn Muǵaljar qyrattarynyń boıyndaǵy qar sýymen tolyǵatyn bulaqtardan alatyn úlken jáne kishi Shalqar kólderiniń qazirgi ýaqytta qatty tartylǵany sonshalyq, jaǵalaýdan birneshe shaqyrymǵa alystap, qurǵaǵan arnalaryn qamys men qoǵa basty.
Ekologııalyq jobanyń bas merdigeri – «TOLAGAI-2050» JShS-i sarapshylar men gıdrolog mamandardyń qatysýymen taldaý jumystaryn bastap ketti. Endi qar ketisimen kólge sý keletin ańǵarlar men bulaq bastaýlaryn tolyq zertteý jumystary bastalmaqshy. Oǵan tabıǵat qorǵaý mekemesiniń mamandary da atsalysyp, qalpyna keltirý jobasynyń kóldi qurtý jobasyna aınalyp ketpeýin qatań qadaǵalaýy qajet. Jergilikti tabıǵat janashyrlary, sonyń ishinde Shalqar aýdanynyń belsendi azamattary kóldi tazartý jumystarynyń qorshaǵan ortaǵa zııan keltirmeı júrgizilýin erekshe baqylaýda ustaýy tıis.
