«Jańa jylǵa jańa tartý! «Naýryz-Dýman« ánine túsirilgen tuńǵysh beınebaıannyń álemdik tusaýkeseri! 32 jyl shyrqalǵan ánniń alǵashqy beınebaıanyn áz-Naýryzǵa ázız úmitin jalǵaıtyn barshaǵa Jevis komandasy usynyp otyr. Ulys oń bolsyn, aǵaıyn!», delingen habarlamada.
Ándi Roza Rymbaeva, Mádı Syzdyqov, AYREE, Qaraqat Bashanova, ÁMRE, Erjan Maksım shyrqady.
Tanymal ánniń sózi Muqaǵalı Maqataevtyki, ánin kompozıtor Talǵat Sarybaev jazǵan.
«Naýryz meıramynyń alǵash toılana bastaǵan kezi bolatyn. 1988 jyly Muqaǵalı Maqataevtyń kitabyn alyp kompozıtor Talǵat Sarybaevqa bardym. Aqynnyń «Naýryz-dýman» óleńine án jazyp berýin ótindim. О́zimniń bolashaq týyndyny qalaı kórip turǵanymdy sózben sýrettep berdim. Kompozıtor oıymdy birden túsindi. Men qalaǵan minez ben stılde án jazdy. Joldasym Tasqyn Oqapov – mýzykanyń bilikti mamany edi ǵoı. О́zi rejısser, ózi kompozıtor, ózi án óńdeýshi bolatyn. Jańa týyndyny birden unatty. Sodan «Naýryz-dýmandy» tutas kompozısııaǵa aınaldyrýdy usyndy. Onyń usynysymen ánniń ortasyna ataqty «Shernııaz» kúıin qostyq. Ánniń ulttyq boıaýy qalyńdap, tynysy keńip, qazaqtyń naǵyz bolmysyn, qonaqjaı da darhan peıilin kóz aldyńyzǵa keltiretin ánmen tyńdarman osylaısha qaýyshty» dep eske alady Qazaqstannyń halyq ártisi, atalmysh ánniń alǵashqy oryndaýshysy Roza Rymbaeva.
Klıptiń rejısseri Jansaıa Kópbaeva, qoıýshy operatory Erkinbek Pitirálıev, sýretshisi Beken Narbaı. Áýendi óńdeýshi Álı Oqapov.
