Sýretti túsirgen Erlan OMAR, «EQ»
Densaýlyq saqtaý mınıstrliginiń keshegi kúngi taratqan málimeti boıynsha 23 310 adam koronavırýs ınfeksııasynan emdelýde, olardyń ishinde 7 811 pasıent stasıonarda, 15 499 naýqas ambýlatorııalyq deńgeıde em qabyldaýda. 348 adamnyń jaǵdaıy aýyr, 81 pasıenttiń jaǵdaıy óte aýyr, 52 naýqas О́JT apparatynda jatyr.
Qazirgi ýaqytta Nur-Sultan qalasynda ınfeksııalyq stasıonarlarda COVID-19 juqtyrǵan 489 pasıent emdelip jatyr. Bul týraly qalalyq qoǵamdyq densaýlyq saqtaý basqarmasynyń basshysy Tımýr Muratov málimdedi. Ol elordada reanımasııa bóliminde em qabyldap jatqan naýqastar sany artqanyn, qazirgi ýaqytta 55 adam jansaqtaý bóliminde jatqanyn jetkizdi.
«COVID-19 ınfeksııasyn juqtyrǵan pasıentter sany naýryz aıyndaǵy meıramdardan keıin kúrt artqany baıqalyp otyr.
Bul sanıtarlyq normalardy saqtamaı, jurttyń jappaı jınalatyn oryndarǵa barýy jáne karantın rejimin saqtamaýy sebepti bolyp otyr.
Elordalyq dárigerler men medısınalyq qyzmetkerlerdiń bári eki ese júktememen jumys istep júr. Búgingi tańda ınfeksııamen kúreske 3 700-den astam medısına qyzmetkeri tartyldy. Qajet bolǵan jaǵdaıda jumyldyrylatyn qosymsha kadrlyq rezerv bar», dedi T.Muratov.
Búgingi tańda elordada 11 aýrýhana, onyń ishinde 10 ınfeksııalyq, bir karantındik «Ramada Plaza qonaqúıi», úsh medısınalyq uıym bazasynda qosymsha 300 ınfeksııalyq tósektik oryn bar.
«KVI-men kúresý úshin atalǵan stasıonarlar basqa aýrýlarmen aýyratyn naýqastardy burynǵydaı josparly da, shuǵyl da tártippen emdeı alatyn bolady», dep atap ótti qalalyq qoǵamdyq densaýlyq saqtaý basqarmasynyń basshysy.
Qalanyń bas memlekettik sanıtarlyq dárigeri Sarhat Beısenova Nur-Sultan qalasy epıdemııalyq jaǵdaıdy baǵalaý matrısasy boıynsha 17 kúnnen beri «qyzyl aımaqta» turǵanyn, kúnine 150-den 280-ge deıin jaǵdaı tirkeletinin málimdedi.
«Qala 17 kúnnen beri epıdemııalyq jaǵdaıdy baǵalaý matrısasy boıynsha «qyzyl aımaqta» ornalasqan. Kúnine 150-den 280-ge deıin jaǵdaı tirkeledi. Sońǵy aptada syrqattanýshylyq deńgeıi aldyńǵy aptadan 21%-ǵa joǵary, 100 myń turǵynǵa shaqqandaǵy qarqyndy kórsetkish – 129,6 qurady. Reprodýktıvti sany – 0,99», dedi S.Beısenova.
Sanıtarlyq dárigerdiń málimetinshe, 2021 jyldyń basynan beri qala boıynsha syrqattanǵandar sany 10 myńnan asty, pandemııa bastalǵaly 28 756 jaǵdaı tirkeldi (onyń ishinde 18 285 – sımptomatıkalyq jáne 10471 – sımptomsyz). Aqpan aıynda syrqattanýshylyq dınamıkasy qańtarmen salystyrǵanda 25%-ǵa tómendegeni baıqaldy. Alaıda sońǵy alty aıdaǵy eń joǵary kórsetkish – qańtar aıynda oryn alǵan joǵary deńgeıdiń qaıtalanyp otyrǵany baıqalady.
«Osy merekelik aptada naýqastarmen baılanysta bolǵandar sany 10%-ǵa ósti, ıaǵnı 500-den 735 adamǵa deıin, bul qala turǵyndarynyń karantındik sharalardy, onyń ishinde úı karantın rejimin saqtamaǵanyn kórsetedi. Sonymen qatar ótken aptamen salystyrǵanda balalar arasynda aýrýdyń 5%-ǵa, ıaǵnı 210-nan 339-ǵa deıin ósýi baıqalady», dep atap ótti elordanyń bas sanıtarlyq dárigeri.
Qazirgi ýaqytta belsendi oshaqtar sany – 1 512, onyń ishinde: úı – 976, uıymdastyrylǵan – 536, onda 3361 baılanysta bolǵan adam medısınalyq baqylaýda. Sonymen qatar qala turǵyndary men qonaqtaryna, sol sııaqty kásipkerlik sýbektilerine karantın rejiminiń talaptaryn qatań oryndaý mindetteledi. Elordanyń bas sanıtarlyq dárigeri S.Beısenovanyń aıtýynsha, árbir aýdan ákimdiginde 8 monıtorıngtik top qurylǵan.
«2021 jylǵy 19-24 naýryz aralyǵynda monıtorıngtik toptar 198 reıd júrgizdi, onyń barysynda 756 nysan tekserilip, shekteý jáne karantın talaptaryn saqtamaıtyn 40 nysan anyqtaldy. 2021 jylǵy 1 qańtardan 19 naýryzǵa deıin aýdandyq polısııa basqarmalarynan 319 materıal kelip tústi, onyń ishinde 21 172 830 teńge somasyna 95 ákimshilik aıyppul qaraldy jáne salyndy, 12 276 370 teńge somasyna 72 aıyppul qysqartylǵan tártippen tólendi, 59-y qaraýsyz qaldyryldy (foto, beıne materıal joq), 19-y nazarǵa alyndy, 21-inde buzýshylyq faktisi rastalmady, 2 materıal boıynsha jazaǵa tartý merzimi (2020 jylǵy qazan, qarasha) aıaqtaldy», dedi S.Beısenova.
Mamandandyrylǵan aýdanaralyq ákimshilik sotqa karantın talaptaryn oryndamaıtyn 47 «qasaqana buzýshyǵa» qatysty 54 materıal jiberildi. Qazirgi ýaqytta elordanyń 13 kásipkerlik nysanynyń qyzmeti toqtatyldy, olardyń ishinde: Tekuila karaoke-bary, ZOLOTO meıramhanasy, Stories laýndj bary (qazirgi ýaqytta «Dva grýzına»), «Abba» laýndj bary, Alanııa» túngi klýby, Echo laýndj bary, «Janym sol» karaoke-bary, Kango batýt ortalyǵy, Ginza karaoke-meıramhanasy, Alanya karaoke-meıramhanasy, Nirvana bary, «Loto-klýby» bar.
«Aıta ketý kerek, Qazaqstan zańnamasynyń talaptaryn qasaqana elemeý jáne kásipkerlik sýbektileriniń qyzmetin ýaqytsha toqtatý bóliginde sot jáne sot oryndaýshylarynyń qaýlylaryn oryndamaý faktileri bar. Búgingi tańda koronavırýs ınfeksııasy boıynsha epıdemııalyq jaǵdaı turaqsyz, elorda áli de «qyzyl aımaqta» tur, qala turǵyndary arasynda koronavırýs ınfeksııasy jaǵdaılarynyń ósýi baıqalady. Alaıda buǵan qaramastan jeke tulǵalar men kásipkerlik sýbektileri Qazaqstan Respýblıkasy men Nur-Sultan qalasynyń Bas memlekettik dárigeriniń buqaralyq is-sharalardy ótkizýge tyıym salý týraly Qaýlysynyń talaptaryn saqtamaıdy», dep túıindedi elordanyń sanıtarlyq dárigeri.
