Adal eńbegimen nápaqa tapqysy kelgen jas jigit gúl kóshetteri kelgen soń bólme gúlderin baptaýǵa kirisedi. Ýaqyty jetkende ósken gúlderdi ret-retimen naryq baǵasyna saı satylymǵa shyǵara bastapty. Stýdenttiń qolǵa alǵan kásibi aı ótken saıyn alǵa jyljypty. Aıtýynsha, bastapqyda aıyna 500 myń teńge shamasynda kiris kirse, qazir 5 mıllıon teńge kóleminde tabys taýyp otyr eken. Árıne, óz isin jetik meńgerýge den qoıǵan azamattyń alǵa qoıǵan aýqymdy jospary da bar. Bolashaqta kásibiniń aıasyn keńeıtýge táýekel etken.
Ol tosynnan tyń jol taýyp túren salmasa da, bastapqyda anasy daǵdylanǵan kásipti tańdaǵan kórinedi. Qaıyrbek qazir óńirdegi eń jas kásipkerlerdiń sanatyna enip úlgergen. Ýaqyt óte kele, ol óziniń dostary men baýyrlaryn da osyndaı kásip bastaýǵa úgittepti. Búginde 10 azamatty jumyspen qamtyp, aı saıyn 200 myń teńge shamasynda jalaqy berip otyr.
«Halyqaralyq arýlar merekesi qarsańynda 15-20 mln teńge shamasynda shyǵyndalǵan edik. Búginge deıin shyqqan shyǵynnyń jartysyn qaıtaryp úlgergenimizdi aıta ketken jón. Kez kelgen kásip sekildi túsine bilgen adamǵa bul da ońaı sharýa emes. Ár nárseniń mehnatyna tózýge týra keledi. Gúldi ózimiz muqııat baptap, ósirip júrgen jaıymyz bar. Ýaqtyly sýaryp turamyz. Erinbeı eńbektenseń, gúl de jaıqalyp ósedi, oǵan degen suranys ta artady.
Dál qazir tez arada gúldemeıtin gúlderdi ósirýdiń mańyzy zor dep esepteımin. Máselen, Makla Makfıkýs, Fıkýs Benjemın, Sheflera jáne Fıkýstyń ózge de surypty gúlderi eshqandaı gúl ashpaıtynyn eskergen lázim. Biz de osy máselege aıryqsha nazar aýdaryp júrmiz. Munyń bári ýaqytpen, tájirıbemen keletinin bir kisideı túsindik», deıdi jas kásipker.
Qaıyrbek bul kásipke tosynnan kelmegen eken. Gúl ósirý isi 12 jyl buryn otbasylyq bastamadan bastaý alǵan kórinedi. Anasy úı jaǵdaıynda jarty myńǵa jýyq gúldi baptap, kishigirim saýdamen aınalysýǵa bet burypty. Sodan beri bul otbasy osy kásipti tabys kózine aınaldyra bastapty. Al Qaıyrbektiń boıyndaǵy qyzyǵýshylyq 9-synypta oıanǵan eken. Ulynyń boıyndaǵy qulshynysty baıqaǵan ata-anasy qoldaý kórsetip, jigerlendirgen. Osylaısha, ol izdenis izine túsip, kásipti ármen qaraı damytý jolyn qarastyrǵan.
Qazir gúl saýdalap tolaıym tabysqa kenelip otyrǵan jas kásipker áýelgi tabysyn 8-synypta taýyp úlgeripti. Ol kezde Qaıyrbek elimizdegi karantındi paıdalanyp, medısınalyq betperde satýǵa den qoıǵan. Sol ýaqytta kásip ashýǵa, ony damytýǵa degen qulshynysy aıtarlyqtaı artqan kórinedi.
Qaıyrbektiń qalaýymen salynǵan jylyjaı dál qazir qulpyryp-aq tur. Mundaǵy san túrli boıaý kózdiń jaýyn alatyny aqıqat. Jylyjaıda qazirgi kezde gúldiń
50 túriniń 6 myń danasy jaıqalyp ósip tur. Aıtýynsha, Gardenııa jáne Sıklomen sekildi gúlder mınýs 10 gradýsqa tózimdi kórinedi.
Qarapaıym otbasynda ósken azamat qazir Sherhan Murtaza atyndaǵy Taraz ýnıversıtetiniń zań fakýltetiniń 1-kýrs stýdenti. Udaıy izdenis izinde júrgen jas kásipker qandaı da bir kásipti bastar aldynda ony tolyqqandy zerdeleýdiń mańyzy zor dep esepteıdi. Onyń aıtýynsha, tynymsyz izdenis qana turaqty tabysqa bastaıdy. О́z isin jan-jaqty zerttegen adam ǵana táýekelge bel býa alady. Gúl ósirip nápaqa aıyryp, adamdardy jumyspen qamtyp otyrǵan azamatqa tabysyń ortaımasyn degennen basqa aıtarymyz joq.
Jambyl oblysy
