Ulttyq ekonomıka mınıstri Áset Erǵalıevtiń aıtýynsha, byltyr bıznes salasyna erekshe nazar aýdaryldy. Máselen, 2020 jyly engizilgen moratorııdiń nátıjesinde bıznes sýbektilerin tekserý 4,6 ese azaıǵan. Onyń ishinde shaǵyn jáne mıkrobıznesti tekserý 7 ese kemidi. «Bıznestiń jol kartasy – 2025» baǵdarlamasy boıynsha shaǵyn jáne orta bıznes sýbektilerin sýbsıdııalaý 7 mlrd teńgege artty. Sondaı-aq salalyq shekteýler alynyp tastaldy. «Qarapaıym zattar ekonomıkasy» baǵdarlamasy boıynsha nesıeleýdiń jalpy kólemi 1 trln teńgege kóbeıgen. Sýbsıdııalaý merzimi 10 jylǵa deıin uzartylyp, taýar men kórsetiletin qyzmet tizbesi keńeıtilgen. Kepildik berý quraly jaqsartylǵanyn da atap ótken jón.
– Bıznes-ahýaldy jaqsartý úshin zańnamalyq túzetýlerdiń 8 toptamasy qabyldandy. Qazaqstan Dúnıejúzilik banktiń Doing business reıtınginde úsh satyǵa kóterilip, 192 memlekettiń ishinen 25-orynǵa ıe boldy. «Qabyldanǵan sharalar 2020 jyly ishki jalpy ónim qurylymyndaǵy shaǵyn jáne orta bıznestiń úlesiniń 30,5 paıyzǵa deıin ósýin qamtamasyz etti, – dedi Áset Erǵalıev mınıstrliktiń alqa otyrysynda.
Vedomstvo basshysynyń aıtýynsha, byltyr memlekettiń ekonomıkadaǵy úlesin tómendetý jáne básekelestikti damytý sharalary qabyldandy. Jekeshelendirýdiń 2020 jylǵa deıingi keshendi josparyn iske asyrý aıaqtalyp, 736 uıymdy básekeli ortaǵa shyǵarýdy kózdeıtin 2025 jylǵa deıingi jańa jospar ázirlendi. Bul rette, memlekettiń ekonomıkaǵa qatysý úlesi 14,9 paıyzǵa qysqarǵan.
– Tarıftik saıasatta turǵyndarǵa arnalǵan tarıfterdiń ósýin tejeý boıynsha jumystar atqaryldy. Osy jyldyń basynda turǵyndarǵa arnalǵan tarıftiń ósýi tejeldi. Onyń ishinde, sýmen jabdyqtaý 0,34 paıyzǵa, jylýmen jabdyqtaý 3,75 paıyzǵa, sý burý 1,37 paıyzǵa jáne elektrmen jabdyqtaý 3,92 paıyzǵa tómendedi. Budan bólek 2020 jyly tótenshe jaǵdaı men karantın kezinde turǵyndarǵa arnalǵan tarıfter ortasha eseppen 7,4 paıyzǵa azaıdy. Nátıjesinde, halyqtyń 1 mlrd teńgesi únemdeldi, – dedi mınıstr.
Investısııa tartý da kenjelep qalǵan joq. 2021 jylǵy 1 qańtarǵa deıin 1,5 trln teńgege 863 memleket-jekemenshik áriptestigi jobasy jasalǵan. Byltyr jobalar sany 2018 jylmen salystyrǵanda 86 paıyzǵa ósken.
– Iri qalalardyń tóńiregindegi ınjenerlik jáne áleýmettik ınfraqurylymdy jańǵyrtý jumystary jalǵasty. 23 mlrd teńgege 49 joba iske asyryldy. 112 shaqyrym avtojol, 1 myń shaqyrym ınjenerlik jeli, 11 áleýmettik nysan salyndy. 19 monoqala men 7 shaǵyn qalada 670 jumys orny qurylyp, 200 shaqyrym jol men ınjenerlik jeli jańǵyrtyldy. «Aýyl – el besigi» jobasy sheńberinde 90 mlrd teńgege 986 joba júzege asyryldy. «Dıplommen – aýylǵa!» jobasy boıynsha ótken jyly 8,8 myń mamanǵa kóterme járdemaqy berilip, 5 myńy turǵyn úımen qamtamasyz etildi, – dedi Á.Erǵalıev.
2020 jyly salyq zańnamasyna bıznesti qoldaý maqsatynda birqatar ózgeris engizildi. Sonyń biri – múlik salyǵyn tóleýden bosatý. Jeke kásipkerler jeke tabys salyǵynan bosatyldy. Aýyl sharýashylyǵy ónimin óndirýshiler aýyl sharýashylyǵy maqsatyndaǵy jer salyǵyn tólemeıtin boldy. Áleýmettik mańyzy bar azyq-túlik taýaryn satý men ımporttaý úshin qosymsha qun salyǵy mólsherlemesi 12 paıyzdan 8 paıyzǵa tómendetildi.
