– Bul qýanyshty oqıǵa 2019 jyly boldy. Otbasymyzǵa Balpyq bı kentinen keń úı buıyrdy. Biz oǵan deıin páter jaldap kelgenbiz. Úı máselesinen aýdan ákimdigi habardar bolatyn. Kóp balaly áýlet retinde qamqorlyq pen kómekten qur qalmasaq ta, baspanaǵa qol jetkizý arman edi. Osy jyly elimizde kóp balaly otbasylardyń jaǵdaıy jıi sóz bolyp, bılik te, qaltaly azamattar da kómek qolyn soza bastady. Bir kúni aýdan ákimdiginen habarlasyp, jaqynda baspanaly bolatynymyzdy aıtty. Qýanyshymyz qoıynymyzǵa syımaı, ýádeli kúndi kúttik. Mereıli sát kelgende bizdi azamattar Balpyq bı aýylynyń Qazybek bı kóshesine alyp kelip, «Myna úı endi sizderdiki...» dedi. Kishigirim isshara uıymdastyryldy. Áýeli baspana máselemiz bulaı jyldam sheshile salǵanyna senbedik. Bir kúlip, bir jylap júrmiz. Úı 5 bólmeli, aýlasy keń, jemis baǵy men baqshasy da bar eken. Ákimdik ókilderi osy keń saraıdaı úıdi bizge satyp alyp bergen jeke kásipker ekenin jáne ol kisi óziniń atyjónin qupııa qaldyrýdy ótingenin aıtqanda kóz jasyma erik berdim. О́mirde qanshama qaıyrymdy jandardyń baryn bilsem de, dál mundaı jomarttyqty kútpegen edik. Qazir 8 balamyzben sol bir qaıyrymdy jan syılaǵan úıde turyp jatyrmyz.
«Oń qolyńnyń bergenin sol qolyń kórmesin» degen sóz bar ǵoı, bizdiń qamqorshymyz osyny berik ustanatyn parasatty adam bolsa kerek. Biz ol kisiniń jaqsylyǵyn umytpaımyz, únemi duǵatilegimizge qosyp otyramyz. Atyjónin anyqtaýǵa da áreket etpedik. О́ıtkeni qaıyrymdy jan muny qalamasa kerek. Al bıyl, araǵa birer jyl salyp «Egemen Qazaqstan» gazeti arqyly oıymdy jurshylyqpen bóliskim keldi. Jer betinde jaqsy adamdardyń bar ekenin, olar qıyn kezde kómek qolyn sozatynyna senemiz. Sondaı júregi keń azamattardyń bárine myń alǵys! – deıdi kóp balaly ana Gúlzıra Soltanǵazıeva.
Jalpy, Almaty oblysynda muqtaj jandardy, onyń ishinde kóp balaly áýletterdi turǵyn úımen qamtý máselesi kún tártibinen túsken emes. Bul izgi baǵyttaǵy iske kásipkerler de úlken úles qosyp keledi. Mysaly, byltyr 1258 kóp balaly otbasy baspanaly bolsa, onyń ishindegi 180 úıdi aımaqtaǵy mesanattar syıǵa tartqan eken. Al bul ıgi dástúr bizdiń keıipkerimiz turatyn Kóksý aýdanynda bıyl da jalǵasypty.
– Karantın kezinde aýdanda turatyn muqtaj adamdarǵa 12 mln teńgeden astam somaǵa qaıyrymdylyq kómegi kórsetildi. Munyń ishinde kóp balaly otbasylar da bar. Aýdan boıynsha olardyń sany – 1103. Bul áýletterdiń jaǵdaıy bizdiń nazarymyzdan tys qalǵan emes. Baspanasyzdardy úı kezegine qoıý men demeýshilerdiń kómegimen olardyń úıli bolýlaryna yqpal ete beremiz. Jaqynda memlekettik baǵdarlama arqyly Muqanshy aýylyndaǵy kóp balaly otbasy baspanaly boldy. Munan bólek, osy qys merziminde aýdanda demeýshilerdiń qarjysyna 41 az qamtylǵan otbasyǵa jalpy somasy 500 myń teńgege azyqtúlik berilip, 40 otbasyǵa 550 myń teńgege otyn túsirildi, – deıdi aýdan ákimi Almas Ádil.
Aıtpaqshy, muqtaj jandarǵa kómek, onyń ishinde qysqy maýsymǵa daıyndyq barysy boıynsha oblystyń barlyq óńirinde qaıyrymdylyq sharasy belsendi túrde júrgizildi. Bul sharaǵa bıýdjetten 46 mln teńge jumsalsa, demeýshiler birlesip, 272,4 mln teńge jınaǵan. Nátıjesinde, Jetisýda bir aıda 18 myńnan astam adamǵa naqty kómek kórsetilgen.
