«Bul – meniki emes, úkimettiki...» degen pıǵyl qashan túzeledi?

Qaıbir jyly oblys ortalyǵynyń kóshelerine shyny aıaldamalar or­na­tylǵanda buzaqylar birinen soń birin qıratyp, ıesiz qalǵan úıdiń te­re­zesindeı qylyp edi. Bar jańanyń astan-kesteńin shyǵaratyndardyń bul essizdigine toqtaý joq. Sodan da bolar, maıysqan kóshe shamyn, tóńkerilip jatqan oryndyq pen qoqys shelegin, synǵan ne boıalǵan shaǵyn sáýlet músinderin kórsek, «Bul ne masqara?» dep keıimek túgil, nazar aýdarmaýǵa aınaldyq. Tipti qa­la­ny abattandyrý maqsatynda ja­ńa­shyldyq engizilip jatsa, «Bul qansha kún turady eken?» degen oı qylań beretini belgili.

 Osydan birer jyl buryn Pet­ro­pavl qalasynyń ortalyq ala­ńyna smart-oryndyqtar, Kárim Sú­ti­shev kóshesiniń boıyna shahmat ornatyldy. Kelesi kúni smart-oryndyqtardyń sol túni qıraǵany jaıly habar tarady. Qyzyl­jar­lyq­tardyń ermegine aınalǵan shah­mat­tyń da dáýreni uzaqqa barmady. Fıgýralaryn jaý shap­qandaı qyldy. Keıin shahmattar­dy jóndep, qaıta ornyna qoıdy. Bul joly da «Endi qansha kún turady eken?» degen suraq kókeıge oraldy. Al myna oryndyq qansha kún osylaı jatady eken degen oımen men balamdy alyp dalaǵa shyqtym. Esik aldynda birinshi kireberiste turatyn tanys apa kezdesti.

– Osynda týysym turady, soǵan kelip edim. Myna kireberistiń ishi tap-taza. Lıftiniń ishinde ilýli tur­ǵan jarnama taqtasy sol qalpy. Tipti anyq­tama qyzmetteriniń telefon nó­mi­rine deıin jazyp, ilip qo­ıyp­syń­dar, – dedi.

– Oǵan nege tańdandyńyz?

– Bizdiń kireberistiń aǵash esigin syndyryp, qabyrǵaǵa súıep qoıdy. Syrtqy esik temir bolǵasyn ǵana shydap tur. Tazalyq jaıly aıtqym da kelmeıdi.

– Esikti kim syndyrsa, soǵan jón­det­peısizder me?

– Syndyrǵan adamdy izdep jatqan eshkim joq. Esik qabyrǵaǵa súıeýli kúıi birneshe kún turdy. Sosyn osy jazda aýyldan kóship kelgen bir aqsaqaldyń balasy jóndep, qaıta ornatty. Qazir tártipti álgi aqsaqal qadaǵalap júr. Sen­derdiń kireberisterińde páter ıe­le­riniń ózderi turatyn shyǵar. Bizdegi páterlerde turatyndardyń toqsan paıyzy – jalǵa alýshylar, – dedi.

Sol sátte sanama sańylaý tús­ken­deı boldy. «Bul – meniki emes, úki­mettiki» degen burynǵy keńestik tuty­nýshylyq pıǵyl áli de túzelmeı, ur­paqtan-urpaqqa aýysqan ba, qalaı? Búgingi jastardyń ishindegi bilimine emes, bilegine sengenderdiń jany ashymastyǵyna qarap, «Sonda óziń ómir súrip otyrǵan eliń de seniki emes, úkimettiki me?» dep suraǵyń keledi...

Araılym BEISENBAEVA,

jýrnalıst

PETROPAVL