Áńgimeni esitip turǵan Súleımen paıǵambar kúlimsirep: «Áı, shymshyq! Sen, shynymen de, meniń sáldemdi teńizge laqtyra alasyń ba?» dep suraıdy. «Joǵa, ýa, Allanyń paıǵambary! Árıne, joq. Biraq erkektiń bári sózin ótkizý úshin irileý áńgime aıtatyny bar emes pe? Sondaı tirlik qoı meniki», depti erkek shymshyq uıalyp.
Sonda Súleımen patsha urǵashy torǵaıǵa qarap: «Al sen she? Kúıeýińnen nege qashyp júrsiń? Ol seni jaqsy kóredi eken ǵoı?», dep suraq qoıady.
«Joq, ýa, Allanyń paıǵambary! Ol meni jaqsy kórmeıdi. Tek saıraǵan tilimen ǵana jaqsy kóremin deıdi. Arǵy jaǵynda ondaı emes. Bul menen basqa shymshyqtardy da jaqsy kóredi», dep jaýap qaıyrady urǵashysy.
Osyny kórip, esitip turǵan Súleımen paıǵambar bir sát tereń oıǵa shomyp baryp, aıtqany mynaý eken: «Ýa, Qudaıdyń qudireti! Kip-kishkentaı shymshyqtyń ózi bir júrekke eki mahabbat syımaıtynyn qalaı bildi eken? Al adamdar she? Qalaısha olar qyzyldy-jasyldy dúnıeni, mal-múlikti, baılyqty sonsha jaqsy kórip turyp ta, Allany da jaqsy kóremin deıdi?».
Paıǵambardyń da ózine oı salǵan bul áfsanany árkim óziniń júregin mazalaǵan jaıttarǵa buryp alyp, ártúrli tarqatyp alsa da bolǵandaı eken.
Sol oqıǵaǵa kýá bolǵan sý patshasy Súleımen: «Ýa, Alla Taǵalam! Júrekterge О́zińe degen mahabbatty ǵana ornyqtyrshy! Senen artyq eshkimdi, esh nárseni jaqsy kórmeıikshi», dep jylap turyp duǵa etken eken.
Mine, jahandy ýysynda ustaǵan pandemııa taǵy da basyn kóterdi. Byltyr dál osy ýaqytta – sáýirde indet juqtyrǵandar sany kóbeıe bastaǵan kezdiń ózinde koronavırýstyń bar ekendigine senbeıtinder kóp edi. Bul «ǵalamdyq saıasat», dep túrli boljam aıtyp júrgen jandardyń da baqılyq bolǵanyn kórdik.
О́mir degen – ótirik, ólimniń haq ekendigine qaıta-qaıta kóz jetkizip, álem soǵyspaı-aq, táýbesine kelgendeı boldy. Qundylyqtar ózgerdi. Indet baılyqtyń da, basqasynyń da densaýlyq joq jerde quny kók tıyn ekendigin adamzattyń esine salyp ótti. Kózdiń jaýyn alǵan nebir kóılekter kıilmeı, altyn-kúmister taǵylmaı, saltanaty asqan meıramhanalardyń shamdary aılar boıy jaǵylmaı qaldy.
Adamnyń da balasy shymshyqtardaı óz uıalarynan shyǵa almaı qalǵan kúnderde kimniń shańyraǵy bekem, kimniń shańyraǵy shatqaıaqtap turǵany kórindi. Bir úıde tursa da dedektep júrip, birin-biri kórmeıtin otbasy músheleri uzaq jyldardan keıin óz jaqyndarynyń janyna úńilýge múmkindik alǵan joq pa?!
Búkil álemde pandemııa kezinde ajyrasýǵa umtylǵandar sany kóbeıdi. Koronavırýstyń «otany» bolǵan, otbasynyń bútindigine strategııalyq, tipti ıdeologııalyq turǵyda asa mán beretin Aspanasty elinde karantınnen keıin birin-biri kórmesteı bolyp, ketisýge aryz bergender sany kúrt kóbeıdi. Zańgerler neke buzýǵa ótinish bergenderdiń kóptigi sonshalyqty tirkeýge úlgere almaı jatty.
Al Japonııada «koronavırýstyq» ajyrasýlar dúmpýin toqtatý úshin Kasoku deıtin jyljymaıtyn múlik agenttigi aıla oılap tapqandaı bolyp, uzaq ýaqyt birge oqshaýlanýda otyrǵandyqtan, júıkeleri tozǵan erli-zaıyptylarǵa bólek turýǵa bolatyn bólmelerdi jalǵa bere bastaıdy. Tize berseń, mundaı oqıǵalar, tipti kóp. Keıbir «koronavırýstyq» ajyrasýlardyń sebepterine adam tańǵalady.
Kerisinshe, bir-birimen ońasha qalýǵa eshqashan ýaqyty bolmaı kelgen, syılastyǵy men seniminen ajyramaǵan juptar karantındegi kúnderden lázzat alyp, damyl taýyp, uıadaı úılerinde bala-shaǵasymen birge «shyqylyqtasyp», baqytty shaqtardy bastan keshirgeni daýsyz.
Shymshyqtardan shyqqan shataq sııaqty, bir júrekke eki mahabbat sııa ala ma? Adamnyń da qudaıy – jalǵyz. Qus ekesh qus ta satqyndyqty, baıany joq qosarly ómirdi keshirmeıdi eken-aý. Biraq pendeler ózimizden basqa tirshilik ıelerinde de parasat, muń, qyzǵanysh, qýanysh pen qaıǵy bar ekenine kózimizdi jumyp qaraıtynymyz ókinishti.
Adam balasyna úlken synaqtar kelgen kezde ony tize qosqan tatýlyqpen ǵana, birimizge birimiz kóngende ǵana jeńe alatynymyz aıan. Áıtpese álemdi sheńgeline qaıta túsirgen bul indet burynǵysynan da qaýiptirek, burynǵydan da juqpaly.
