Qazaqstandyq opera ánshisi Maıra Muhamedqyzy seriktes elderdiń eń tanymal klassıkalyq oryndaýshylary nomınasııasy boıynsha jeńimpaz atandy.
Qalyptasqan dástúr boıynsha laýreattarǵa marapatty álemdik deńgeıdegi juldyzdar, aty ańyzǵa aınalǵan opera oryndaýshylary jáne sheteldik dıplomattar tabystaıdy. Bizdiń otandasymyz syılyqty Qazaqstannyń Reseıdegi elshiliginiń keńesshisi Edil Hozeulynyń qolynan aldy.
Maıra Muhamedqyzy osyndaı bedeldi marapatqa ıe bolý tosyn syı bolǵanyn jáne úlken mártebe ekenin aıtty. «Men 30 jyldan astam shyǵarmashylyq qyzmetimde kóptegen baıqaýlardyń jeńimpazy bolǵanyma qaramastan, búgingi tańda tanymal tulǵalardyń arasynda tarıhı sahnada turý men úshin óte qyzyqty ári áserli boldy», dedi ol.
Reseılik tanymal telejúrgizýshi Andreı Malahov óz kezeginde bul jeńisti qazaq ánshisiniń daryny men jetistiginiń laıyqty dáleli dep atap, oǵan bar jaqsylyqty tiledi.
Bravo syılyǵynyń atqarýshy prodıýseri Iýrıı Andreıchýk Qazaqstan álemge tańǵajaıyp óner tulǵalaryn syılaıtynyn atap ótti. «Búgin biz opera jáne balet teatrynyń alǵashqy ánshi dırektory – bizdiń syılyqtyń laýreaty Maıra Muhamedqyzyn qarsy alǵanymyzǵa qýanyshtymyz, bul biz úshin asa qurmet», dedi ol.
Maıra Muhamedqyzy – Qazaqstannyń eńbek sińirgen artısi, Qazaqstan Respýblıkasy Memlekettik syılyǵynyń laýreaty, kóptegen tanymal halyqaralyq baıqaýlardyń laýreaty, Parıjdegi «Grand Operanyń» alǵashqy qazaqstandyq solısti. Osy jyldyń qańtarynda ol Shymkenttegi opera jáne balet teatrynyń dırektory bolyp taǵaıyndaldy.
Bravo syılyǵy 2017 jyly quryldy jáne 2018 jyldan bastap jyl saıyn klassıkalyq jáne tanymal mýzyka salasynda beriledi. 2020 jyly koronavırýstyq pandemııaǵa baılanysty tapsyrý rásimi ótken joq.
Syılyqtyń ereksheligi nomınanttardy usyný aıqyndyǵy jáne artısterdiń tanymaldylyǵynyń obektıvti kórinisin jeke kózqaras boıynsha emes, mýzyka ındýstrııasynyń kásibı mamandary usynǵan jáne konsertterge satylǵan bıletter sany, sınglder men albomdardyń taralymy, ánderdiń radıo men teledıdarda tanymal bolýy, YouTube-te qaralý sany, buqaralyq aqparat quraldarynda aıtylǵan málimetter jáne t.b. analıtıkalyq kórsetkishterdiń nátıjeleri boıynsha jasaý bolyp tabylady.
