«UBT elektrondyq formatta «bir testilenýshi – bir kompıýter – bir kamera» qaǵıdaty boıynsha uıymdastyrylady. Aýdıtorııada ne bolyp jatqanyn kórsetetin kameralardan basqa, testilenýshi otyratyn ár ústeldiń ústinde taǵy bir kamera ornatylady. Proktorıng pen beınebaqylaýdyń zamanaýı júıesi jáne UBT-da bógde adamdardy boldyrmaý úshin Face ID sıfrlyq sáıkestendirý qurylǵysy paıdalanylady», dedi uıymdastyrýshy.
Erejelerdiń saqtalýyn arnaıy kompıýterlik baǵdarlama baqylaıdy, Ol tyıym salynǵan zattardy qoldaný faktilerin avtomatty túrde anyqtaıdy. Eger UBT tapsyrý kezinde talapkerdiń smartfon, shpargalka jáne t.b. tyıym salynǵan zattardy paıdalanǵany anyqtalsa, testileý avtomatty túrde toqtatylady, testilenýshiniń nátıjeleri joıylady. Al buzýshylyqty birden baıqamasa, beınejazbalar tamyz aıynyń sońyna deıin taǵy da qaralady.
Testileý prosesin qosymsha ahýaldyq ortalyq baqylaıdy. Sondaı-aq ashyqtyq pen obektıvtilikti qamtamasyz etý úshin UBT-ny ótkizý rásimine Sybaılas jemqorlyqqa qarsy is-qımyl agenttiginiń arnaıy monıtorıngtik toby men «Adaldyq alańy» jobalyq keńsesiniń ókilderi shaqyrylady.
Sonymen qatar UBT tapsyrý kezinde aqparattyq qaýipsizdikti qamtamasyz etýge erekshe kóńil bólinedi. Testileý prosesi shıfrlaý elementteri bar arnaıy jabyq VPN jelisi arqyly júzege asyrylady. Osynyń barlyǵy Akademııalyq adaldyq qaǵıdattarynyń saqtalýyn baqylaýdy kúsheıtýge múmkindik beredi.
