Polısııa basshysynyń pikirinshe, urlyqtyń aldyn alý úshin maldy erkin jaıylymǵa qaraýsyz jibermeý kerek. Urylardyń kóbi qadaǵalaýsyz júrgen maldy urlaıdy.
Departament bastyǵynyń málimetinshe, ákimdikterdiń yqpal etýimen 262 mal turaǵy uıymdastyrylǵan. Byltyr 18 myń bas mal sondaı turaqtarǵa qamalyp, urlyqtyń aldy alynǵan, 5 myńǵa jýyq mal ıesi ákimshilik jaýapqa tartylǵan.
– Atalǵan qylmysty ashý jáne aldyn alý maqsatynda profılaktıkalyq reıdter júrgizildi. Atap aıtsaq, bazarlar men et satý oryndaryna tekserý júrgizilip otyrady. Mysaly, tosqaýyl beketteri uıymdastyrylyp, urlanǵan maldy tasymaldaýmen aınalysatyn 8 qylmysker ustaldy. Taǵy 336 azamat qujatsyz mal jáne et ónimderin tasymaldaǵany úshin ákimshilik jaýapqa tartyldy, – dedi Saǵat Mádıev.
Oblystyń bas polıseıi jedel-izdestirý is-sharalaryn ótkizý nátıjesinde mal urlaýmen aınalysqan 14 toptyń quryqtalǵanyn jáne 700-den astam mal ıelerine qaıtarylǵanyn atap ótti. Máselen, osy jyldyń aqpanynda Ulan aýdanyndaǵy erkin jaıylymnan qaraýsyz júrgen 19 bas jylqy joǵalǵan. Olardy izdeý bir aptaǵa sozyldy. 20 polısııa qyzmetkeri jumyldyrylyp, bes birlik tehnıka jáne tikushaq tartyldy. Kásibı mamandardyń eńbeginiń arqasynda joǵalǵan jylqylar tabyldy. Polıseılerdiń aıtýynsha, bul bir ǵana jaǵdaı emes, qaraýsyz júrgen mal jıi joǵalady.
Alaıda qaraýsyz mal ǵana emes, baǵýly túlikti tumsyq astynan urlap ketý faktisi de joq emes. Mysaly, Aıagóz aýdany, Baıqoshqar aýylynyń turǵyny Perimhan Qulqaev 2020 jyly 1 sáýirde úıirge qosqan jylqysyn joǵaltyp alǵan. Aıtýynsha, izdestire kele jylqysyn 19 sáýirde bir sharýa qojalyǵynan tapqan eken. Olar jylqyǵa tańba salyp úlgergen. Sóıtip qojalyq ıesi Perimhan Qulqaevqa malyn qaıtarýdan bas tartqan. Amaly taýsylǵan ol polısııaǵa aryzdanǵan.
– Polısııa eshqandaı shara qoldanbady. Kerisinshe, 29 shildede isti dálelsiz dep jaýyp tastaǵan. Kýágerler de bar. Ádiletsizdikke kónbeı aýdandyq, oblystyq prokýratýraǵa da aryz túsirdim. Ázirshe, esh nátıje joq, – deıdi Perimhan Qulqaev.
Osy máselege baılanysty Shyǵys Qazaqstan oblystyq Polısııa departamentine suraý joldaǵan edik. Quqyq qorǵaý qyzmetkerleriniń jaýabyna qaraǵanda, is áli jabylmapty. P. Qulqaevqa tıesili jylqynyń joǵalýyna baılanysty sotqa deıingi tergeý júrgizilip jatqan kórinedi. Aryzdanýshynyń jylqysy oblys turǵyndarynyń biriniń úıirinde ekendigi týraly boljam tekserilýde. Al úıir ıesi ol jylqynyń ózine tıesili ekenin aıtyp, aryzdanýshynyń boljamyn joqqa shyǵaryp otyr. Qazirgi ýaqytta tıisti saraptama jasaý josparlanǵan. Nátıjesi boıynsha túpkilikti prosestik sheshim qabyldanady.
Shyǵys Qazaqstan oblysy
