Oblystyq Tótenshe jaǵdaılar departamenti baspasóz qyzmetiniń málimetine súıensek, aýa raıynyń kúrt jylytýyna baılanysty óńirde órt qaýpi kezeńi bastalǵan. 4 sáýirden bastap búginge deıin 22 ret shóp órti tirkeldi. Zaısan, Glýbokoe, Besqaraǵaı, Úrjar, Besqaraǵaı, Tarbaǵataı, Kókpekti, Aıagóz, Jarma, Kúrshim aýdandarynda jáne О́skemen, Semeı qalalaryndaǵy tilsiz jaýdyń jalpy aýdany 243,6 gektar shópti sharpyǵan.
«Eldi mekenderde, aýyl sharýashylyǵy alqaptarynda qoqysty órteý kezinde halyqtyń otty abaısyz paıdalanýyna baılanysty jáne tabıǵat aıasyndaǵy demalys kezinde sóndirilmegen temeki tuqylynyń saldarynan órt sany kúrt artady. Orman-dala órtin boldyrmaý maqsatynda TJD qyzmetkerleri reıdke shyǵyp, halyq arasynda túsindirý jumysyn júrgizýde. Sondaı-aq jergilikti polısııa, orman sharýashylyǵy qyzmetkerlerinen órt qaýipsizdigi talaptaryn buzýshylardy anyqtaý maqsatynda orman alqaptaryn patrýldeý úshin mobıldi toptar quryldy», delingen habarlamada.
Orman jáne dala alqaptarynda órt qaýipsizdigi erejelerin buzǵandarǵa QR ÁQBtK-niń 336, 367, 410-baptaryna sáıkes ákimshilik jaýapkershilik qarastyrylǵan.
Osy rette, mamandar janyp turǵan sirińke, temeki tuqylyn tastamaý qajettigin, órttiń orman jáne dala alqaptarynan eldi mekenderge taralyp ketýine jol bermeý úshin janǵysh qoqysty shyǵarý jáne eldi mekenderdiń aýmaqtaryn jınaý qajettigin eske salady. О́rt shyqqan jaǵdaıda dereý «101», «112» nómirlerine qońyraý shalý kerek.
