Qanat bastaǵan qaıyrymdy jigitter Saı-О́tes aýylynda jastar úshin fýtbol alańyn salyp berdi. Osy eldi mekenge kireberistegi joldy 2-3 shaqyrym shamasynda jamap-jasqap, halyq ıgiligine usyndy. Endi aýyldaǵy jaǵdaısyz otbasyǵa shaǵyn baspana salyp berýge kirisipti. Olar byltyr indet bastalysymen el úshin jumyla eńbek etti. Aqtaýǵa baryp, oblystyq aýrýhanaǵa ottegi ballondaryn tasyp tynym kórmedi.
– Sol kezde naýqastardyń kópshiligi aýdandardan, aýyldyq jerlerden kelip jatqanyn baıqadyq. Olar aýylda nege emdelmeıdi degen oı keldi. Sóıtsek, ballon, ottegi joq eken. Dereý «Halyqqa kómek» shtabymen birlesip, aýyldarǵa ottegi jetkizýmen aınalystyq. Mańǵystaý aýdanynyń barlyq aýylyna deýge bolady, sondaı-aq Jańaózen qalasy mańyndaǵy eldi mekenderge aýa toltyrylǵan bir ottegi ballony, alty-jeti aýa toltyrylǵan qapshyq, pýlsoksımetr jetkizilip berildi jáne olardy qatty naýqastardyń úılerine aparyp berdik. Kúni-túni damyl tappaı júrgen aýyr kúnder boldy ol kez, – deıdi Qanat Raqymuly.
Jaqynda Qanat bastaǵan qaıyrymdy jigitter Saıyn Shapaǵatov aýylynda kóp balaly otbasynyń salyna bastaǵanmen, aıaqtalmaı qalǵan baspanasynyń qurylysyn aıaqtap, qystyń sýyǵynda sylaǵy da bitpegen úıdi panalaýǵa májbúr bolǵan jandardyń qoltyǵynan demep, ishi-syrty syńǵyraǵan sý jańa úıge kirýine sep boldy.
– Shúkir, janyma júregi jumsaq, jaqsylyq jasaýǵa qushtar jigitter toptasty, – degen Qanat dostarymen birge el ıgiligine áli talaı sharýany atqaratynyna senimdi.
Mańǵystaý oblysy
