BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkasııalar qyzmeti alańynda ótken brıfıngide málim etkenindeı, monıtorıngtik toptar osy aıda 365 reıd júrgizdi.
Barlyǵy 2309 nysan qamtyldy. 19 nysanda karantın tártibin buzýshylyq anyqtaldy. 57 hattama toltyrylyp, 4 mln 244,235 myń teńge aıyppul salyndy.
Nurlybek Ermekulynyń sózine qaraǵanda, óńirde bıylǵy qańtarda – 1837, aqpanda – 1950, naýryzda – 2138, sáýirde 1696 adamnan koronavırýs anyqtaldy. Sáýirde KVI juqtyrǵan naýqastarmen qarym-qatynasta bolǵan 3295 adam anyqtalyp, medısınalyq baqylaýǵa alyndy. О́tken aptamen (2-8 sáýir) salystyrǵanda, sońǵy aptada (9-15 sáýir) indet juqtyrý kórsetkishi (760-tan 832-ge) 8,6 paıyzǵa ósken. Osy aıda aýyrǵandardyń 578-i (34 paıyzy) – jumys isteıtinder, 418-i (24,6 paıyzy) – zeınetkerler, 408-i (24 paıyzy) – jumyssyzdar, 129-y (7,6 paıyzy) – oqýshylar, 44-i (2,5 paıyzy) – medısına qyzmetkerleri, 34-i (2 paıyzy) – muǵalimder. «Oqý jyly bastalǵannan beri barlyǵy 758 oqýshydan koronavırýs tabyldy, sonyń 387-si dástúrli sıpatta, 371-i qashyqtan oqıdy. Tórtinshi toqsanda (1 sáýirden bastap) 129 oqýshynyń (48-i dástúrli sıpatta, 81-i qashyqtan bilim alady) syrqattanǵany tirkeldi», dedi N.Mustaev.
Sáýir aıynyń basynan beri 14715 adam memlekettik shekaradan ótse, sonyń 3384-i – jolaýshylar. Anyqtamasy bolmaǵan 283 jolaýshynyń altaýynan kovıd anyqtaldy. Halyqaralyq júk tasymalymen aınalysatyn 7508 júrgizýshiniń 1759-ynda anyqtama bolmaı shyqty. Olardan indet tabylǵan joq.
