«Búgin, 16 sáýirde Taldyqorǵanda jerlendi», dedi Almat Múlikov. Sonymen birge qoǵam belsendisi Dına Tańsáriniń aıtýynsha, Aıajannyń denesi týystaryna myrysh tabytpen berilgen.
Eske sala keteıik, Almaty qalalyq Polısııa departamentiniń resmı ókili Saltanat Ázirbektiń sózinshe, kúdikti jasyrynǵan páterden qaıtys bolǵan stýdent qyzdyń denesiniń bólshekteri tabyldy.
«Kúdiktini ustaý kezinde ol óz-ózine qol jumsamaq bolyp denesin jaraqattaǵan. Biraq onyń bul áreketi iske aspady. Oqıǵa ornyna dárigerler shaqyrtylyp, ustalǵan adam №7-shi aýrýhanaǵa jetkizildi. Ony táýlik boıy kúzetedi. Aıyqqannan keıin kúdikti tergeý ızolıatoryna aýystyrylady. Kúdiktiniń aıtýynsha, Aıajan ekeýiniń arasynda janjal týyp, sosyn ol ony óltirip, qylmystyń izderin jasyrýǵa tyrysqan. Osy maqsatty kúdikti qyzdyń denesin bólshektegen. Dene bólshekterin qalanyń ár jerine laqtyryp úlgergen. Sot oǵan qatysty qamaýǵa alý túrindegi sharany qabyldady. Tergeý júrip jatyr», dedi Saltanat Ázirbek.
29 naýryzda kúdikti aýrýhanadan shyǵarylyp, PD janyndaǵy ýaqytsha ustaý ızolıatoryna 2 aıǵa qamaýǵa alyndy. Kúdikti Túrkistan oblysynyń týmasy, buryn sottalmaǵan. Al 31 naýryzda marqumnyń jaqyndary aıýandyqpen óltirilgen Aıajan Edilovanyń denesin áli kúnge deıin jer qoınyna tapsyra almaı júrgenin aıtqan edi.
