Turǵyndary kúrt kóbeıýi saldarynan áleýmettik máseleleri kún tártibine kóterilgen Jańaózen qalasynda 262 kóp páterli turǵyn úı bar jáne onyń ishinde 52 úı kúrdeli jóndeýdi qajet etedi. 1967-1971 jyldary paıdalanýǵa berilgen bul úılerge sodan beri kúrdeli jóndeý jasalmaǵan.
– Jańaózen qalasyn áleýmettik-ekonomıkalyq damytýdyń keshendi jospary aıasynda 2018 jyly Samruk-Kazyna Trust áleýmettik jobalardy damytý qorynyń demeýshiligimen 25 kóp páterli úılerge kúrdeli jóndeý jumystaryn júrgizýge 257 mln teńge qarajat bólingen bolatyn. Osy qarajattyń 74 mln teńgesi atalǵan turǵyn úılerge qurylys-tehnıkalyq zertteý júrgizýge, energoaýdıt jasaýǵa, jobalyq-smetalyq qujat ázirlep, vedomstvodan tys saraptama qorytyndysyn alýǵa jumsaldy. Saraptama qorytyndysyna saı, kúrdeli jóndeý jumystarynyń quny 1,6 mlrd teńgeni quraıdy, – deıdi Jańaózen qalalyq turǵyn úı ınspeksııasy bóliminiń basshysy Súıindik Muhamedov.
Onyń aıtýynsha, qazirgi kezde bólingen qarajattyń qalǵan bóligine, ıaǵnı 183 mln teńgesine 3 kóp páterli turǵyn úıge kúrdeli jóndeý jumystary júrgizilýde. Jóndeý jumystary bıyl mamyr aıynda aıaqtalady dep josparlanǵan.
Kúrdeli jóndeý jumystary barysynda kóp páterli turǵyn úılerdiń tireý konstrýksııalary, baspaldaqtary, shatyry jańartylyp, ishki ınjenerlik jelileri tolyq aýystyrylyp, syrtqy kelbeti árlenip, energotıimdi nysanǵa aınalatyndyǵy aıtylýda. Sondaı-aq bul óz kezeginde turǵyn úıdiń paıdalaný merzimin uzartýǵa yqpal etedi eken. «Jańartyldy» degen jeleýdi jamylyp jyltyraq boıaýmen battastyra salmaı, jóndeýdiń sapaly júrgeni mańyzdy.
Jergilikti atqarýshy organ tarapynan da jóndeý jumystarynyń sapaly júrgizilýine erekshe baqylaý jasalýda, deıdi quzyrly mekemedegiler. Sondaı-aq turǵyndar tarapynan da «Menshik ıeleri birlestigi» qurylyp, jóndeý jumystaryn óz qadaǵaýlaryna alǵan. Kúrdeli jóndeý júrgizilip jatqan turǵyn úıler qoldanystaǵy turǵyn úı zańnamasyna sáıkes basqarýdyń jańa formatyna kóshedi. Iаǵnı páter ıeleri kooperatıvinen «Menshik ıeleriniń birlestigi» nysanynda basqarylatyn bolady. Iske menshik ıeleriniń aralasýy jóndeý jumystarynyń sapasyna degen senimdi arttyrsa, basqarý formatyndaǵy ózgerister jóndelgen úılerdiń keleshegine jaýapkershilikti joǵarylatady degen oıǵa jeteleıdi.
Onsyz da biraz aıqaı-shýǵa sebep bolyp, turǵyndarynyń narazylyǵyn, túsinbestigin týdyrǵan apatty úılerdiń sanatyn tolyqtyrmaı, eski úılerdiń der kezinde jóndeýge ilikkenine qýanasyń, endi olar «eski» degen aıdardan qutylatyn bolady. Tek jumystyń sapasy, nátıjesi qýantsyn deıik.
Mańǵystaý oblysy
