Qurlyq básekesinde 55 kılo salmaq dárejesinde óner kórsetken Arlı Chonteı qossaıys qorytyndysy boıynsha 255 (115+140) kılo ziltemirdi eńserip, Azııa chempıony atandy. 2019 jyly Qytaıda ótken Azııa birinshiliginde 246 kılomen úshinshi oryndy qanaǵat tutqan qazaqstandyq sportshy, mine, araǵa eki jyl salyp altyn júldege qol jetkizdi. Bul – 2012 jyldan beri Qazaqstan týy astynda óner kórsetip kele jatqan Chonteıdiń Azııa birinshiligindegi alǵashqy altyn medali. Buǵan deıin birneshe Azııa jáne álem chempıonattarynda baq synaǵan Arlı júldeli oryndarǵa shamasy jetpeı, bapkerlerdiń de, jankúıerlerdiń de úmitin aqtaı almaı kele jatqan edi.
Basqa jarystardy bylaı qoıǵanda, mamandar dál osy sportshy 2016 jyly Rıoda ótken Olımpııa oıyndarynda el qorjynyna júlde salady dep qatty sengen bolatyn. О́kinishke qaraı, qolda turǵan qola medalǵa synyq súıem qalǵanda súrinip, óziniń alǵashqy Olımpıadasyn tórtinshi orynmen túıindegen edi. Dese de keıingi bes jyldyqta bul sportshy aıtarlyqtaı nátıje kórsete bastady. Máselen, 2017 jyly Qytaıda ótken Jazǵy Ýnıversıadada qola, 2018 jylǵy Ashǵabattaǵy álem birinshiliginde ekinshi orynǵa taban tirep, kúmis júlde enshiledi.
Tashkenttegi Azııa chempıonatynyń osy salmaqtaǵy kúmis júldesi de jerlesimizge buıyrdy. Arlı Chonteıden 11 kılo kem kótergen Abylaı Áýelhanov 244 kılo (108+136) nátıjemen ekinshi oryn ıelendi. Ár jarysta joǵary nátıje kórsetýdi ózine mindet etip qoıatyn Áýelhanov bul joly da bas júldeden úmitti edi. Tipti serpe kóterýde alǵash 136 kılony kótergennen keıin ekinshi múmkindigine 141 kıloǵa tapsyrys berdi. Biraq bul salmaq jerlesimizge baǵynbady. Sońǵy múmkindiginde táýekelge bel býyp, 148 kılo ziltemirdi kóterýge sheshim qabyldady. Eger ziltemir baǵynyp jatsa, Azııa chempıony atanady, kótere almasa, kúmisti qanaǵat tutatady. О́ıtkeni úshinshi orynda turǵan sırııalyq sportshy 137 kılomen jarysty aıaqtap qoıǵan edi. Úshinshi múmkindigin kóterý úshin jarys alańyna shyqqan jerlesimiz 148 kılony basynan asyra kótere almady. Sóıtip óziniń eresekter arasyndaǵy alǵashqy Azııa chempıonatynda kúmis medalǵa qol jetkizdi.
Byltyr ǵana jasóspirimder arasyndaǵy Álem kýbogynda top jaryp, bıyldan bastap eresekter arasyndaǵy dúbirli dodalarda boı kórsete bastaǵan qandasymyz úshin bul tamasha nátıje deýimiz kerek. Bir qyzyǵy, osydan bir aı buryn onlaın formatta ótken el chempıonatyndaǵy Arlı men Abylaı arasyndaǵy tartysta Áýelhanov jeńiske jetti. Sol jarysta alǵashqysy – 253 (112+141), ekinshisi 254 (108+146) kılony baǵyndyrǵan edi.
Sonymen qatar jarystyń alǵashqy kúninde taǵy eki sportshymyz bas júlde úshin synǵa túsken bolatyn. О́kinishke qaraı, Igor Son (61 kg) men Zúlfııa Chınshanlo (55 kg) jankúıerler úmitin aqtaı almaı, júldeli oryndardan quralaqan qaldy. Erler arasyndaǵy 55 kılo salmaqta 2019 jyly Taılandta ótken álem chempıonatynyń kúmis júldegeri Igor Son bıylǵy Azııa chempıonatyn tórtinshi orynmen aıaqtady. Alǵashqy julqa kóterý baǵdarlamasyn tap-tamasha bastap, 132 kılomen kishi qolaǵa qol jetkizgen jerlesimizdiń serpe kóterýde joly bolmady. Birinshi múmkindiginde 152 kılony ońaı eńsergenimen, qalǵan eki múmkindiginde de 156 kılo ziltemirdi baǵyndyra almady. Eger otandasymyz sońǵy múmkindigin tıimdi paıdalanǵanda, birden kúmis júldege qol jetkizetin edi. Bul salmaqta áıgili qytaılyq sportshy Lı Fabın top jardy. Qossaıys qorytyndysy boıynsha ol 312 (142+170) kılo ziltemirdi baǵyndyrdy.
Áıelder arasynda úsh dúrkin álem chempıony, eki dúrkin Azııa oıyndarynyń kúmis júldegeri degen dardaı ataǵy bar jerlesimiz Zúlfııa Chınshanlo Azııa chempıonatynda besinshi oryn aldy. Igor Son sııaqty Chınshanlo da alǵashqy julqa kóterý baǵdarlamasynda 92 kılo ziltemirdi eńserip, kishi qola medal ıelendi. Serpe kóterýdegi birinshi múmkindiginde 118 kılony baǵyndyrǵanymen, qalǵan eki múmkindiginde 122 kılony eńserýge shamasy jetpedi. Sóıtip 210 kılomen qurlyq básekesinde besinshi oryndy qanaǵat tutty. Altyn júlde 222 (98+124) kılo kótergen qytaılyq sportshy Lıao Sıýıýnniń enshisinde ketti.
