Rýhanııat • 20 Sáýir, 2021

«Qurmetti azamat» atanýyma kómektesshi...»

522 ret kórsetildi

Osyndaı ótinishti alys-jaqyn aǵaıyndar ara-tura aıtyp jatady.

Qyzyljar óńirinde dardaı basshylyq qyzmet atqaryp júrgen kezinde bylyq-shylyǵy áshkerelenip, ornynan alynyp qana qoımaı, bul týraly óńirlik buqaralyq aqparat quraldarynda jazylyp, abyroıy jalpaq jurttyń aldynda aırandaı tógilgen bir jasy úlken kisi arada on shaqty jyl ótkende maǵan: «Aldaǵy jetpisjyldyq mereı­toıymnyń qarsańynda «Soltústik Qazaqstan oblysynyń Qurmetti azamaty» ataǵyn alǵym keledi. Qandaı járdemiń bolady?..» dep qolqa salǵany bar. Memlekettik qyz­mettegi mansabyn masqarashylyqpen aıaq­taǵanyn  múldem umytqandaı, «Ol ataqty men almaǵanda kim alady?» degendeı, menmensı sóılegenine qarap, «Myna aǵamyz qalaı ózi?..» dep, qaıran qalǵanmyn. Sodan keıin álgi eks-sheneýnik oblys túgil, ózi týyp-ósken aýdannyń qurmetti ataǵyn alýǵa eńbegi sińdi me eken dep, surastyryp kórgenimde tipti jaǵamdy ustadym. Sebebi ol bir kezde óziniń týǵan aýylynyń qyrýar jerin balasynyń atyna jalǵa alyp, eginshilikpen aınalysqanymen, jumysqa salǵan aýyldastarynyń eńbegine durys aqy tólemeı jáne olardyń ózine senip tapsyrǵan jer úlesteri úshin de jartymdy eshteńe bermeı, bárin qatty renjitken bolyp shyqty. «Ol aǵaıdy aýdanymyzdyń «Qurmetti azamaty» ataǵyna usynsam, basym pálege qalady. О́ıtkeni ony munda eshkim qurmettemeıdi», dedi aýdan ákimi. 

Jýyrda astanada turatyn taǵy bir jer­lesim  habarlasyp, «Soltústik Qazaqstan ob­lysynyń Qurmetti azamaty» ataǵyn ázirge sura­maı-aq qoıaıyn, áýeli óz aýdanymdikin alsam da jarar. Sen aýdan basshylaryn  tanısyń ǵoı, bir aýyz sózińdi aıtshy...» dep qıyldy. Ol azamat ómir boıy basqa óńirlerde qyzmet istegen edi. Alǵan ataq-marapaty da bir basyna jeterlikteı. Tek onyń ózi týyp-ósken aýdany túgil, týǵan aýylyna da qolushyn sozyp, qaraılaspaǵanyn bilemin. Sondyqtan qoshtamaǵanymdy sezdirip, úndemedim.

Negizi, oǵan renjýge de bolmas. Sebebi qazir aýdannyń ǵana emes, oblystyń «Qur­met­ti azamaty» degen ataǵynyń ózin de kim al­maı jatyr?! «Aq degeni – alǵys, qara degeni – qarǵys» bolyp turǵan ákimder jer­gilikti máslıhattardyń óz aıtqandarynan shyq­paıtyn «kóńilshek» depýtattarynyń «bir aýyzdan» qoldaýymen kimge bergisi kelse, soǵan bere salady.

Máselen, teriskeı óńirdiń burynǵy ákim­deriniń biri  oblystyń «Qurmetti azamaty» ataǵyn ózine  meshittiń ashanasyndaǵy  aýyz­asharda qatyryp maqtap bata bergen aq­saqalǵa ápergeni áli esimde. Al ol kisi kezin­­de jarytyp jumys istemeı, zeınetke bir jyl buryn attandyrylǵanyn (keńes óki­meti tusynda sondaı «jeńildik» bolǵan) jaqsy bilýshi edim...

Sondaı «qurmettilerdiń» ishinde jurt jemqorlyǵyn biletin keshegi sheneýnik te, paraqorlyǵy úshin ornynan alynǵan sýdıa da bar. Osyndaı  ataqty óziniń kandıdattyq dıssertasııasyn «jazýyna» járdemdesken ǵalymǵa áperip turyp: «Bul kisige aldaǵy ýaqytta mal sharýashylyǵyn kóterýge aıanbaı atsalysatyndyǵy úshin avanspen beremiz», dep ishek-silemizdi qatyra kúldirgen ákim de bolǵan. Ol ákimniń ózi de keıin qyzmetinen sógis alyp, túsip qalsa da, arada ýaqyt óte kele, «qurmettilerdiń» qatarynan oıyp oryn alypty. «Bir qyzymnan bir qyzym soraqy» degendeı, jýyrda buryn sybaılas jemqorlyq qylmysy úshin sottalyp, túr­mede birneshe jyl otyryp shyqqan eks-sheneý­nikke de mereıtoıyna oraı kezinde ózi bas­qarǵan aýdannyń «Qurmetti azamaty» ataǵy berilipti dep estidim.

Árıne «Qurmetti azamat» ataǵyn alǵan­dar­dyń ishinde laıyqty tulǵalar  az emes. Tek solar jurt aldynda abyroıdan jurdaı bol­ǵan, el ishinde bıeni búgimen, túıeni túgimen jut­qan jemqorlyǵy  jaıly neshe túrli «ańyz» aıtylatyn keshegi sheneýniktermen saltanatty jıyndarda bir qatarda otyrýǵa ishteı uıalyp, namystanatyn da shyǵar-aý...

Sondyqtan osy, qadiri túsken ataqty berýdi doǵaryp, onyń ornyna bálenbaı aýdannyń jáne bálenbaı oblystyń «Qurmetti mesenaty» nemese «Atymtaı jomarty» degen jańa ataq engizsek jáne ony  Elbasy usynǵan «Týǵan jer» baǵdarlamasyna qýana ún qosyp, týyp-ósken aýyldaryna mıllıondaǵan teńgeniń áleýmettik-mádenı ǵımarattaryn salyp berip jatqan kásipker azamattarǵa bersek, durys emes pe? Shyntýaıtynda, mundaı jańa ataqtyń jóni bólek qoı. Al dańqqoı aǵaıyndarǵa ataq kerek bolsa, atamekenderine qolushyn bersin. Bálkim, sonda jergilikti basshylarǵa árkimdi salyp, ataq suraýshylyq ta óz-ózinen tyıylar...

 

Sońǵy jańalyqtar

Dollar qymbattady

Qarjy • Búgin, 10:59

Elordada áýe shary qulady

Oqıǵa • Búgin, 10:37

Qarjy mınıstriniń orynbasary taǵaıyndaldy

Taǵaıyndaý • Búgin, 10:24

EQYU Bas hatshysy Qazaqstanǵa keledi

Parlament • Búgin, 09:31

Beısenbige arnalǵan aýa raıy boljamy

Aýa raıy • Búgin, 09:00

Uqsas jańalyqtar