Erler arasynda 56 kılo salmaqta saıysqa túsken Erbolat Sabyrdyń (56 kılo) óneri kópshilikti súısindirdi. Kýbalyq Saıdel Ivan Rodrıges Hortamen bolǵan básekede óte saýatty qımyldap, ár soqqysyn eseppen jumsaǵan qazaqtyń qaısar uly Bostandyq araly ókilinen basym tústi.
64 kılo salmaqtaǵy Sabyrjan Aqqalyqovty da qalaı maqtasaq ta jarasady. Onyń da joly Kýbanyń «qara marjanymen» qıysty. Únemi shabýyl ótinde júretin Sabyrjan Darıan Haver Kastroǵa san soqtyrdy.
75 kılo salmaqtaǵy Dıas Moljigitovke lıtvalyq Aleksandr Trofımchýkti tize búktirý aıtarlyqtaı qıyndyq týǵyzǵan joq. Qandasymyz qarsylasyn aldap ta, arbap ta soǵyp, kózdegen maqsatyna qol jetkizdi.
Asa jeńil salmaqtaǵy Sanjar Táshkenbaı ózbekstandyq Ibragım Isjonovtan aılasyn asyrsa, 60 kılo salmaqtaǵy Elnur Súıinbaı brazılııalyq Iýrı Dos Reıesten basym tústi. Al Mádı Ámirov (91 kılo) asa shıelenisti ótken básekede úndistandyq Vıshal Gýpqa 2:3 esebimen ese jiberdi. Osylaısha, rıngke kóterilgen alty jigitimizdiń beseýi jartylaı fınalǵa shyqty.
Qyzdar arasyndaǵy jarysta Juldyz Shaıahmetova (60 kılo), Jasmın Qızatova (69 kılo), Dana Dıdaı (75 kılo) jáne Eldana Tálipova (+91 kılo) syndy sulýlarymyz óz qarsylastaryn utyp, júldeli oryndar úshin talasý múmkindigine ıe boldy.
