16 sáýir kúni saǵat 15.30 shamasynda 5573 áskerı bóliminiń sarbazdary qyzmet barysynda eresek adamsyz jalǵyz júrgen 3 jasar balany kóredi. Balaqaı ulandyqtarǵa ózin Vova dep tanystyrady. Vovanyń anasy biraz ýaqyt óz erkimen ulyn izdep, nátıje shyqpaǵan soń áskerı jasaqtan kómek suraıdy. Onyń aıtýynsha, bir jastaǵy qyzy jylap, sony jubatý kezinde úlken balasy kózden tasa bolyp ketedi. Kóp uzamaı azamatsha áskerı jasaqpen kezdesip, ulymen qaýyshty.
Arada bir saǵattaı ýaqyt ótkende jedel quramnyń taǵy bir áskerı jasaǵy Esil ózeniniń boıynda qoǵamdyq tártipti kúzetip júrgende qolynda samokaty bar, 5 jas shamasyndaǵy alańdaýly balany kezdestiredi. Ulandyqtar ony toqtatyp, mán-jaıdy suramaq bolady. Biraq, ol jerde qaıdan júrgenin, ne úshin júrgenin túsindirip aıta almaıdy. 20 mınýttan keıin polısııa qyzmetkerlerine áıel azamatsha 56 jasar balasynyń joǵalǵanyn, qolynda samokaty baryn aıtyp habarlasady. Bul bala da aman-esen anasyna tapbystaldy.
Senbi kúni, 17 sáýirde saǵat 15.00 shamasynda elordalyq quramanyń jaýyngerleri «Jeruıyq» saıabaǵynda 4-5 jasar jylap júrgen qyz balany kóredi. Ol anasymen serýendep júrip, adasyp qalǵan eken. Áskerı jasaq bastyǵy saıabaqta velosıped teýip júrgen eresekteý balalardan saıabaqtyń arǵy basynda qyzyn izdep júrgen anasyna habar jetkizýin suraıdy. 20 mınýttan soń adasqan búldirshin anasymen qaýyshty.
Osy kúni saǵat 18.40 kezinde atalǵan áskerı bólimniń sarbazdary Kenesary han eskertkishiniń janynan jylap júrgen taǵy bir balany baıqap qalady. Dereý izdestirý sharalaryn uıymdastyryp, 15 mınýt ishinde balanyń anasyn tabady. 3 jasar Eralydan bólek anasynyń qasynda 1,5 jastaǵy qaryndasy men 5 jastaǵy ápkesi de bolǵan. Anasy qyzdarymen sóılesip otyrǵanda Eraly baıqamaı birshama jerge uzap ketken kórinedi.
Al jeksenbi kúni, ıaǵnı 18-sáýirde elordalyq «Jetisý» parkinde saǵat 16.40 shamasynda shuǵyl aqparatta aıtylǵan 5 jasar balany izdestirý kezinde jylap júrgen basqa bir balany jolyqtyrady. Shamamen 3 jastaǵy balaqaı da jaqyndarynan kóz jazyp qalǵanǵa uqsaıdy. Izdeýge kirisip ketken ulandyqtardyń aldynan 10 mınýttaı ýaqyt ótkende balaqaıdyń ákesi shyǵady. Ýaıymnan kózine jas alǵan áke áskerılerdiń qolynan balasyn kórgende qýanyshtan taǵy da kóńili bosap ketti.
Perzentterimen qaýyshqan barlyq ata-analar quqyqtyq tártip áskeriniń sarbazdaryna adal qyzmeti men jedel kómegi úshin alǵystaryn bildirdi.
