Jańashyl bastamanyń taǵy bir ereksheligi – QR-kod kómegimen notarıýsta resimdelgen kez kelgen qujattyń qanshalyqty túpnusqa nemese jalǵan ekenin de ajyratýǵa bolady.
Ádilet vıse-mınıstri Azamat Ámirǵalıevtiń aıtýynsha, mınıstrlik pen respýblıkalyq notarıaldyq palata birlesip qolǵa alyp otyrǵan joba aıasynda e-notarıat aqparattyq júıesi men egov mobile qosymshasyn da ıntegrasııalaý kózdelgen.
Integrasııa osy aptada aıaqtalady. Kelesi aptadan bastap el azamattary notarıaldyq qyzmet kórsetý kezinde elektrondy jeke kýálikterin paıdalana alady.
– Kelesi jyldan bastap Biryńǵaı notarıattyq aqparattyq júıede notarıattyq qujattardy saqtaý úshin ortalyqtandyrylǵan elektrondy repozıtorııdi qurý josparlanýda. Bolashaqta notarıýstar qaǵaz arhıvinen bas tartady. 2021 jyldyń 1 shildesinen bastap jyljymaıtyn múlik pen mámilelerdi resimdeý kezinde eks-aýmaqtylyq engiziledi. Eger buryn jyljymaıtyn múlikpen jasalǵan mámileler notarıýstyń ornalasqan jeri boıynsha kýálandyrylǵan bolsa, endi taraptar onyń ornalasqan jerine qaramastan kez kelgen notarıýsqa júgine alady. Budan basqa, árbir notarıattyq is-áreketke QR-kod beriledi. Bul biregeı bolyp tabylady jáne qujatty burmalaýdan qorǵaýdy qamtamasyz etedi. Halyqqa yńǵaıly bolý úshin elektrondy qujattyń qaǵaz qujatqa teń ekendigin kýálandyrý boıynsha notarıattyq is-áreketter engizildi jáne kerisinshe, bul azamattarǵa qajetsiz jol júrýden, poshtamen jáne kýrerler arqyly jiberýden qutylýǵa múmkindik beredi, – deıdi vıse-mınıstr.
Senimhattyń túpnusqalyǵyn QR-kod boıynsha smartfondaǵy qosymshanyń kómegimen nemese qujattyń sandyq kody boıynsha enis.kz saıtynda Servıs – Senimhatty tekserý bóliminde tekserýge bolady.
Sonymen qatar notarıattyq qupııa uǵymy anyqtalyp, ony saqtaýǵa mindetti adamdar toby qurylmaq. Shaǵymdardy respýblıkalyq deńgeıde qaraıtyn organ zańdy túrde bekitildi. Endi jergilikti jerlerdegi tártiptik komıssııalardyń sheshimderimen kelispegen jaǵdaıda azamattarǵa jańadan qurylǵan organǵa shaǵymdanýǵa múmkindik berildi.
