Bilim • 21 Sáýir, 2021

Bıyl 1000 mektep qaıta jańartylady

25 ret kórsetildi

Kelesi jyldyń sońyna deıin 400 jańa mektep salynady. Bul týraly «Nur Otan» partııasynyń Bilim men ǵylymdy damytý jónindegi respýblıkalyq qoǵamdyq keńesiniń alǵashqy uıymdastyrý otyrysynda belgili boldy, dep habarlaıdy Egemen.kz

Jańadan qurylǵan keńestiń otyrysynda onyń quram bekitilip, aldaǵy jylǵa arnalǵan jumys jospary anyqtaldy.

Partııanyń baspasóz qyzmetiniń habarlaýynsha, keńestiń birinshi kezektegi mindeti – saılaýaldy mindettemelerdiń, sonyń ishinde úsh aýysymdy jáne apatty mektepter problemasyn sheshý jónindegi ýádelerdiń iske asyrylýyn baqylaý. Partııa Lıderi Nursultan Nazarbaevtyń tapsyrmasy boıynsha 2025 jylǵa deıingi tıisti Jol kartasy ázirlendi.

«Nur Otan» partııasynyń Hatshysy Álibek Áldeneıdiń aıtýynsha, bıyldyń ózinde 200 mektep salý, budan bólek taǵy 1000 bilim berý nysanyn jańǵyrtý josparlanǵan.

Bilim jáne ǵylym vıse-mınıstri Bıbigúl Asylova atap ótkendeı, bıleýshi partııanyń saılaýaldy baǵdarlamasyn júzege asyrý aıasynda 800 mektepti paıdalanýǵa berý jospary jasaldy. Olardyń jartysy 2022 jyldyń sońyna deıin salynady.

Otyrys barysynda keńes tóraǵasy, Májilis depýtaty Juldyz Súleımenova bıýdjet qarajatynyń tıimdi jumsalýyna erekshe nazar aýdarýdy tıisti vedomstvo ókilderiniń qaperine saldy.

«Mektep qurylysyna bólingen qarajattyń jumsalýyn taldaý barysynda 18,6 mlrd teńge ıgerilmegeni anyqtaldy. Qoldanystaǵy zańnama buǵan tyıym salmaıtynyna qaramastan, birde-bir aımaq Bilim jáne ǵylym mınıstrligimen qarajatty qaıta bólý týraly kelisimge kelmegen. Baqylaý mehanızmderin kúsheıtý qajet», dedi Juldyz Súleımenova.

Mınıstrliktiń málimetinshe, qazirgi ýaqytta mektepterdegi tapshylyq 265 myń oqýshy ornyn quraıdy. Elimiz boıynsha 137 mektep úsh aýysymda oqysa, taǵy 34-i apatty dep tanylǵan.

Otyrys qorytyndysy boıynsha birqatar usynym ázirlendi. Atap aıtqanda 800 jańa mektep qurylysyn tıimdi iske asyrýdy jáne bıýdjet qarajatyn jumsaýdyń turaqty monıtorıngin qamtamasyz etý úshin «Nur Otan» partııasynyń ortalyq apparatyna aı saıynǵy esep berip otyrý, qoǵamdyq baqylaýdy kúsheıtý, jergilikti atqarýshy organdardyń jaýapkershiligin arttyrý, sondaı-aq óńirlik jáne aýmaqtyq keńes múshelerine árbir mektepke jetekshilik etýdi bekitý.

Eske sala keteıik, buǵan deıin «Nur Otan» Tóraǵasynyń birinshi orynbasary Baýyrjan Baıbek bıleýshi partııanyń saılaýaldy ýádelerin iske asyrýdy qalaı qamtamasyz etýge nıetti ekenin aıtqan bolatyn.

Onyń aıtýynsha, Elbasy, Partııa Lıderi Nursultan Nazarbaevtyń tapsyrmasy boıynsha, sondaı-aq el Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn iske asyrý aıasynda partııanyń qoǵamdyq keńesteriniń jumysy júıeli túrde qaıta qurylalady.

Saıası keńes Bıýrosynyń sheshimimen taratylǵan partııalyq kýratorlar ınstıtýtynyń oryna «Nur Otan»-nyń saılaýaldy baǵdarlamasynyń naqty baǵyttarynyń iske asyrylýyn baqylaý boıynsha 14 respýblıkalyq qoǵamdyq keńes quryldy. Osyndaı keńester óńirlik deńgeıde de qurylǵan.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar