Sport • 21 Sáýir, 2021

Ázirshe úshinshi oryndamyz

90 ret kórsetildi

Bul kúnderi О́zbekstan astanasy – Tashkentte aýyr atletıkadan lısenzııalyq Azııa chempıonaty ótýde. Sary qurlyq dodasyna qatysyp jatqan Qazaqstan quramasynyń qorjynynda ázirshe bir altyn jáne bir kúmis medal bar. Kúni keshe jarys jolyna shyqqan eki sportshymyz, ókinishke qaraı, júldeli oryndardan kórine almady.

Jarysty sátti bastaǵan jerlesterimiz keıingi kúnderi qarqynyn báseńdetip aldy. Úshinshi jarys kúninde erler arasyndaǵy otandastarymyzdan 73 kılo salmaqtaǵy Aqmolda Saıramkez baq synady. 2019 jyly AQSh-tyń Las-Vegas qalasynda ótken jasóspirimder arasyndaǵy álem chempıonatynda 61 kıloda atoı salyp, óziniń myqtylyǵyn dáleldegen Saıramkez araǵa eki jyl salyp, mine, eresekter dýyna qosyldy. Bıyldan bastap jańa salmaqta óner kórsete bastaǵan jas sportshymyz óziniń alǵashqy Azııa chempıonatynda V tobynda synǵa túsip birinshi oryn alsa, jalpy esepte altynshy orynǵa taban tiredi.

Dese de, Aqmolda tómengi topta qalyp qoıdym eken demeı, jarysta baryn saldy. Julqa kóterýde úsh múmkindiginiń tek ekeýin, al serpe kóterýde úsh múm­kindiginiń barlyǵyn tıimdi paıdalanǵan jerlesimiz qossaıysta 310 (130+180) kılo ziltemirdi baǵyndyryp, V tobynda kósh bastady. A.Saıramkezdiń Azııa chempıonatyndaǵy nátıjesin naýryz aıyndaǵy el birinshiligimen salystyrar bolsaq, sportshymyzda ilgerileý bar ekenin baıqaımyz. Máselen, ol Qazaqstan chempıonatynda 306 (130+176) kılony eńserip, kúmis medal ıelengen bolatyn.

Erler arasyndaǵy 73 kılo salmaqta Rıo Olımpıadasynyń chempıony, úsh dúrkin álem chempıonatynda, úsh márte Azııa birinshiliginde dara shyqqan qytaılyq sportshy Shı Chjııýn top jardy. Qossaıys baǵdarlamasy boıynsha ol 363 (169+194) kılony basynan asyra kóterdi. Sondaı-aq julqa kóterýde 169 kılo ziltemirdi eńserip, álem rekordyn jańartsa, serpe kóterýdiń ekinshi múmkindiginen keıin ekinshi orynda kele jatqan túrikmenstandyq qarsylasy Maqsat Meredovtan baqandaı 27 kılo alǵa ozyp ketkendikten, úshinshi múmkindigine shyqqan joq.

Qyzdar arasyndaǵy 64 kılo sal­maqta synǵa túsken otandasymyz Gúl­nur Ybyraı Azııa chempıonatynda besin­shi oryn alǵanymen, Qazaqstan chem­pıo­natyndaǵy nátıjesimen salystyrar bolsaq, nashar óner kórsetti. Tashkenttegi tartysta Gúlnur qossaıysta 197 (87+110) kılo ziltemirdi kóterýge shamasy jetken bolsa, el birinshiliginde ol 206 (92+114) kılomen chempıon atanyp edi. Qyzdar arasyndaǵy saıysta Qytaılyq Taıpeı ókili Ven Chen 228 (100+128) kılomen Azııa chempıony atandy.

Jarystyń alǵashqy úsh kúninen keıin jeti sportshymyz qurlyq birinshiligindegi saıystaryn aıaqtady. Áli jarys jolyna shyqpaǵan 10 sportshymyz bar. Atap aıtar bolsaq, aldaǵy kúnderi erler quramasynan Aleksandr Ývarov (81 kg), Nurǵısa Ádiletuly (89 kg), Artem Antropov pen Rahat Bekbolat (102), Ibragım Bersanov (109), al qyzdar quramasynan Ekaterına Bykova men Aısha Omarova, Karına Quzǵanbaeva (81 kg), Raýshan Meshithanova (87 kg) jáne Aızada Múptilda (+87 kg) Azııa chempıonatynyń júldesi úshin synǵa túsetin bolady.

Baıqasańyzdar, Qazaqstan qurama­synan bıylǵy Azııa chempıonatynda erler arasynda kileń jas sportshylar baq synaýda. Árıne, jarysty aıaqtaǵan Arlı Chonteı men Igor Sondy aıtpaǵanda. Sondyqtan endi jarys jolyna shyǵatyn jigitterden Azııanyń altynyn kútemiz degenimiz ábestik bolar. Degenmen Rahat Bekbolat pen Ibragım Bersanov Tashkentte el qorjynyna júlde salady dep úmittenemiz. О́ıtkeni osydan eki jyl buryn Rahat 16 jasynda dál osy О́zbekstan astanasynda ótken jastar arasyndaǵy Azııa chempıonatynda 102 kılo salmaqta top jarǵan-dy. Sondaı-aq ol jarystyń julqa kóterýinde álem rekordyn da ornatqan edi. Al buǵan deıingi talaı dodalarda júlde alyp, tájirıbe jınaqtaǵan Ibragım Bersanovtyń da Azııa chempıonatynda top jaratyn ýaqyty keldi. Kil el chempıondarynan quralǵan qyzdarymyzdan da jankúıerler júlde kútetini anyq.

Azııa chempıonatynyń alǵashqy úsh kúninen keıin jalpykomandalyq esepte Qytaı sportshylary 5 altyn, 4 kúmis medalmen kósh bastap tur. Keıingi orynǵa qytaılyq Taıpeı ókilderi jaıǵasqan. Olardyń enshilerinde eki altyn medal bar. Al úzdik úshtikti ázirge Qazaqstan quramasynyń sportshylary túıindep tur.

 

Sońǵy jańalyqtar

Araq satylmaıtyn aýdan

Aımaqtar • Keshe

Erlikke toly sýretter

Rýhanııat • Keshe

Uqsas jańalyqtar