Áleýmettik jelide bir kóshede kóptegen patrýldik kóliktiń turǵan vıdeosy jarııalandy. Kýágerlerdiń aıtýynsha munda shamamen 20-ǵa jýyq mashına kelgen.
Qalalyq Polısııa departamentiniń ókilderi búgin tańerteń ál-Farabı dańǵyly men Ǵ.Mustafın kóshesiniń qıylysynda «Mercedes» kóliginiń júrgizýshi qatty jyldamdyqpen qaýipti manevrler jasaǵanyn aıtty.
«Júrgizýshi polısııa qyzmetkerleriniń kólikti toqtatý jónindegi eskertýin elemeı, kerisinshe, jyldamdyqty qosa túsken. Osyǵan baılanysty onyń sońyna birneshe polısııa kóligi túsip, kólikti qorshaýǵa alyp, onyń odan ári qozǵalysyna jol bermedi. Rýlde 1992 jyly týǵan azamat boldy.
Onymen qosa, 2020 jyly qyrkúıekte mas kúıinde kólik júrgizgeni úshin sot júrgizýshi kýáliginen bir jarym jylǵa aıyrǵany belgili bolǵan. Búgin dárigerler onyń esirtkige masań kúıde bolǵanyn rastady.
Atalǵan derek boıynsha QR Qylmystyq kodeksiniń 346-baby boıynsha sotqa deıingi tergeý bastaldy. Kúdikti ustalyp, ýaqytsha ustaý ızolıatoryna qamaldy», dedi Almaty qalasy IID tergeý basqarmasynyń bastyǵy Oljas Sháripov.
Sonymen qatar, jergilikti polısııa basqarmasynyń bastyǵy Manap Sattarov oǵan qatysty 15 ákimshilik hattama toltyrylǵanyn málimdedi.
