Mektep jelisin jańartýdaǵy eń iri qadam Qazaqstan Respýblıkasynyń Prezıdenti Qasym-Jomart Toqaevtyń bastamasymen iske qosylǵan «Keleshek mektepteri» ulttyq jobasy boldy. Úsh jyl ishinde, 2023 jyldan 2025 jylǵa deıin, elde jalpy syıymdylyǵy 460 myńnan astam oqýshyǵa arnalǵan 217 jańa formattaǵy mektep paıda boldy. Jańa ǵımarattar aýdany boıynsha burynǵy tıptik jobalardan 15-20%-ǵa keń, al tehnıkalyq jabdyqtalý deńgeıi olardan tórt ese joǵary. Árbir mektepte eńbekke baýlý sheberhanalary, mýzyka jáne horeografııa zaldary, STEM-zerthanalar, robototehnıka kabınetteri, kovorkıng-aımaqtar jáne sport zaldary jumys isteıdi.
Joba 43 úsh aýysymdy jáne 8 apatty mekteptiń máselesin tolyqtaı sheshýge múmkindik berdi. Barlyq kezeńderde sapany júıeli baqylaýdy jobany úılestirýshi Y. Altynsarın atyndaǵy Ulttyq bilim akademııasy qamtamasyz etedi.
Jańa ǵımarattar salýmen qatar, qoldanystaǵy mektepterdi aýqymdy renovasııalaý júrgizilýde. Memleket basshysynyń tapsyrmasymen 1 300 mektepti biryńǵaı zamanaýı formatqa kóshirý baǵdarlamasy iske qosyldy. 2025 jyly osy baǵdarlama boıynsha 190 myń orynǵa arnalǵan 245 mektep jańartyldy. Jańartylǵan ǵımarattarda kitaphanalar, ashanalar men sport zaldary jóndelip, qaýipsizdik júıeleri retteldi.
Qosymsha qarjylandyrý kózi retinde Prezıdenttiń tapsyrmasymen qurylǵan Bilim berý ınfraqurylymyn qoldaý qory jumys isteıdi. Jemqorlardan tárkilengen qarajat esebinen 86 myń orynǵa arnalǵan 77 mekteptiń qurylysy aıaqtaldy. Olardyń basym bóligi demografııalyq júktemesi joǵary aımaqtarda ornalasqan: Almaty, Túrkistan, Qyzylorda, Jambyl oblystary men Astana qalasynda.
Memleket basshysy qoıǵan basym mindetterdiń biri –qalalyq jáne aýyldyq mektepter arasyndaǵy bilim sapasy alshaqtyǵyn joıý. «Keleshek mektepteri» jobasy boıynsha salynǵan mektepterdiń árbir ekinshisi derlik aýyldyq jerde ornalasqan, barlyǵy 84 nysan. Renovasııa baǵdarlamasy qamtyǵan 1 300 ǵımarattyń 820-sy da aýyldarda ornalasqan. Jyl saıyn 1 000 oqý ornynda pándik kabınetter jańartyla otyryp, jóndeý júrgiziledi. Sonymen qatar, Oqý-aǵartý mınıstrligi shaǵyn jınaqty jáne aýyldyq mekemelerdegi bilim sapasyn arttyrý, kadrlyq qamtamasyz etý men qaýipsizdik máseleleri boıynsha strategııalyq sheshimder daıyndap jatyr.
Aıta keteıik, buǵan deıin 2023-2025 jyldary Qazaqstanda «Keleshek mektepteri» ulttyq jobasy aıasynda 460 myńnan astam oqýshy ornyna arnalǵan jańa formattaǵy 217 mektep salynǵanyn habarlaǵan edik.
