Aýdandyq aýyl sharýashylyǵy bóliminiń basshysy Ádilet Qaspaqbaevtyń aıtýynsha, búginde jergilikti sharýalar kóktemgi egis jumystaryn bastap ketken. Sonymen qatar egistik alqaptarǵa mıneraldy tyńaıtqyshtar bólinip, aýyldaǵy aýylsharýashylyq tehnıkalary 60-70 paıyzǵa jańarǵan. «Memleket qoldaýynyń nátıjesinde, ótken jyly lızıngke 158 tehnıka satyp alyndy. Al aǵymdaǵy jyldyń birinshi toqsanynda 51 tehnıka alyndy. Sondaı-aq memleket tarapynan egis dalasyna arzandatylǵan dızel otyny bólinip otyr», deıdi ol.
Búginde Masanshy aýylynda 40-tan astam sharýa sharýashylyqpen aınalysady eken. Násibin qara jerden tergen jergilikti halyq jyl saıyn egis alqabyn keńeıtip, ónim kólemin ulǵaıtyp keledi. Olar kóbinese sábiz, pııaz sııaqty kókónis túrlerin egedi. Jalpy, atalǵan aýylda aýyl sharýashylyǵy salasy aıtarlyqtaı damyǵan deýge bolady. Máselen, aýdan boıynsha bıyl 134 myńnan astam egistik jerge egin egý josparlanǵan. Bul ótken jylmen salystyrǵanda 14 098 gektarǵa artyq. Aldaǵy ýaqytta bul jumys jalǵasady. Al aýyl turǵyny, «Shenho» sharýa qojalyǵynyń tóraǵasy Ýdjýr Kerım búginde 200-den astam otbasyn jumyspen qamtyp otyr. Qojalyqqa tıesili 15 tehnıkamen sharýalar kún saıyn egis dalasynda jumys isteýde. Sonymen qatar aýyl turǵyny Sheba Hımmanov ta aýyl ishinen 20 sotyq jerge qyzanaq, qııar, sarymsaq sııaqty kókónister egip keledi. Sharýa bıylǵy jyldyń ózinde úsh ret ónim alǵanyn aıtady.
Byltyr Qordaı aýdanynda bolǵan oqıǵa kezinde Masanshy aýylyndaǵy birqatar úı men kásipkerlik nysan zardap shekken bolatyn. Keıinnen memleket tarapynan olarǵa qoldaý kórsetilip, atalǵan nysandar az ýaqyttyń ishinde qaıta qalpyna keltirildi. Máselen, sol kezde aýyl turǵyny Iýsýf Parovtyń úıi órtengen. Oǵan búlingen baspanasynyń ornyna memleket 7 bólmeli úı salyp beripti. Bul týraly turǵyn baspasóz týry kezinde aıtyp berdi. Sol sııaqty, aýyl turǵyny Abdýrashıd Pýtordyń da baspanasy men aýyr júk kóligine órt tıgen eken. Atalǵan turǵynnyń úıi de búginde qalpyna keltirilgen. Aýylda ótken jyly úıi otqa oranyp, memleket qamqorlyǵynyń nátıjesinde qaıta qalpyna keltirilgen birsypyra adam bar. Bul rette jergilikti jurtshylyq qıyn-qystaý kezde qolushyn sozǵan memleketke alǵysyn bildirdi.
Masanshy aýyldyq okrýgi ardagerler keńesiniń tóraǵasy Dydyr Harsanuly búginde aýyl turǵyndarynyń beıbit ári tatý-tátti ómir súrip otyrǵanyn jetkizdi. Al kásipker Rabııa Jınlırova qaqtyǵys kezinde ıeligindegi birqatar kásipkerlik nysannyń órtenip ketkenin saldarynan 20 mıllıon teńge kóleminde zalal kelgenin aıtty. Qazir kásipkerlik nysandar qalpyna keltirilgen.
Mundaı qarqyndy jumystar aýdannyń Qarakemer aýylynda da jalǵasýda. Aýyldyq ardagerler keńesiniń tóraǵasy Erǵazy Bozshaevtyń aıtýynsha, aýylda 20 páterli 10 úı salynypty. Atalǵan úıler áleýmettik az qamtylǵan otbasylar men túrli sala mamandaryna berilgen.
Jıyn barysynda Qordaı aýdanynyń ákimi Rústem Dáýlet aýdannyń búgingi ahýaly týraly suhbat berdi. Ákim óz sózinde ótken jyly Memleket basshysy Qasym-Jomart Toqaevtyń Qordaıǵa saparynda halyq tarapynan áleýmettik máselelerdiń kóterilgenin aıtty. Nátıjesinde, Prezıdent tapsyrmasyna sáıkes, Qordaı aýdanyna el Úkimetiniń, Jambyl oblysy ákimdiginiń qoldaý kórsetkenin jetkizdi. Ákimniń aıtýynsha, byltyr aýdandaǵy 392 jobaǵa 35 mlrd teńge bólingen. Onyń ishinde 11 mlrd teńgege 22 aýyl gazdandyrylyp, aýdan búginde gazben 95 paıyz qamtylǵan. Sol sııaqty, 6,9 mlrd teńgege kósheler jóndelgen. О́z sózinde aýdan ákimi aýylishilik joldarǵa, aýyldardy abattandyrýǵa jáne jaryqtandyrý jumystaryna da memleket tarapynan kóp kóńil bólinip otyrǵanyn aıtty. Sonymen qatar ótken jyly 41 úı men 13 kommersııalyq nysan zardap shekken bolsa, búginde olardyń bári memleket jáne demeýshiler tarapynan qalpyna keltirilgen. Sondaı-aq 135 mln teńgege jýyq qarajatqa aýdan turǵyndaryna kómek kórsetilgen. Jalpy, búginde Masanshy aýylyn mekendeıtin dúngen ultynyń ókilderi qazaq tilin úırený ústinde. Aýyldaǵy №13 orta mekteptiń dırektory Qambar Imanqulovtyń aıtýynsha, atalǵan bilim oshaǵynda 936 bala oqıdy. Bul balalardyń ishinde tek 34 balanyń ǵana ulty qazaq. Alaıda sabaq barlyq bilim alýshyǵa qazaq tilinde júrgiziledi. Bizben kezdesýde atalǵan orta mekteptiń 9-synyp oqýshysy, dúngen ultynyń ókili Zeınep Hıba qazaq tilin jaqsy kóretinin, qurmetteıtinin, sol úshin memlekettik tildi úırengenin aıtyp, aqıyq aqyn Muqaǵalı Maqataevtyń «Sheshe, sen baqyttysyń» óleńin oqyp berdi.
Búgingi tańda Qordaı aýdanynyń Sortóbe aýylynda 24 myń halyq turady. Mundaǵy turǵyndardy negizinen dúngen etnosynyń ókilderi quraıdy. Qazirgi kezde aýyldyń birligi jarasyp, yntymaǵy artyp keledi. Ásirese, dúngen etnosynyń ókilderi qazaq tilin úırenýde belsendilik tanytýda. Aýyldaǵy «Dostyq» balabaqshasynda búginde 27 bala tárbıelenýde. Balabaqsha meńgerýshisi Hedjer Idybonyń aıtýynsha, balalar qazaq tilin úırenýge qushtar eken. Bul maqsatta tıisti jumystar júrgizilip keledi. Sondaı-aq aýyl turǵyny Ledjeı Syrov ta aýyldaǵy ahýaldyń turaqty ekenin aıtty. Aýyl jastaryn ımandylyqqa baýlý maqsatynda ótken jyly Sortóbe aýylynan «Imamdar úıi» ashylǵan bolatyn. Atalǵan ortalyq aýyldyqtardyń túrli suraqtaryna jaýap berip, ıslam, ıman turǵysynda dáris ótkizip keledi. Munda keleli rýhanı basqosý ótip, Sortóbe aýylyna arnaıy kelgen Almaty qalasy, «Baıken» meshitiniń naıb ımamy Nurbolat Dúısebaev kópshiliktiń suraqtaryna jaýap berdi. Qazaqstan musylmandary dinı basqarmasynyń Jambyl oblysy boıynsha ókil ımamy Beıbit Myrzageldıev te suhbat berdi. «Búginde Qordaı aýdanyndaǵy 62 meshitte 91 dinı qyzmetker jumys isteıdi. Onyń ishinde 30 qazaq, 59 dúngen etnosynyń ókili bar. «Otandy súıý – ımannan» demekshi, bul ortalyq halyqty týra jolǵa shaqyratyn jer. Sondaı-aq jergilikti ımamdar da qazaq tilinde ýaǵyz aıtýǵa daıyndalyp jatyr», deıdi Beıbit Myrzageldıev.
Bul kúnde qaıta túlegen Qordaı aýdanynyń eki aýylyndaǵy jaǵdaı búginde turaqty. Jergilikti jurtshylyq memleket qoldaýyna alǵys bildirýde. Aýyldyqtar ózara túsinistik arqyly beıbitshilik pen tatýlyqty qoldap, tirshiligin jalǵastyrýda.
Jambyl oblysy,
Qordaı aýdany
