Buǵan deıin Kóktal aýylynyń turǵyndary ózennen qaýipsiz ótý úshin óz kúshterimen kópir salyp alǵany týraly aqparat taraǵan bolatyn. Ahat Raqyshev ıgi istiń basyn bastap, qolǵabys etkendikten «Qazaqstannyń 100 jańa esimi» jobasynda jeńimpaz atanyp otyr. Al Ahat bul jeńisi týǵan aýylynyń ortaq tabysy ekenin aıtady.
«Negizgi mamandyǵym – muǵalim. Aýylǵa kópir salý kerektigi kópten beri aıtylyp júrgen. Sodan synyptastarymyzben mektep bitirgenimizge 20 jyl bolǵanyn erekshe bir ispen este qaldyrsaq dep kelistik. 30 jyl burynǵy túlekter de osy ıdeıaǵa atsalysty. Kópir qurylysyna negizgi qarajatty osy eki top shyǵardy. Halyq ta qolynda barymen bólisti. Al men balalarǵa syzý páninen sabaq beretin bolǵandyqtan, kópirdiń syzbasyn jobalaý maǵan júkteldi», deıdi Ahat Raqyshev.
Onyń aıtýynsha, kópir salý arqyly aýyldyń bir máselesi sheshilgen.
«Bul iste ózimizdiń aýyldyń ákimi jaqsy qoldaý bildirdi. Qazir kópir el ıgiligine jumys istep tur. Endi sonyń qujatyn zańdastyryp, qaýipsiz qyzmet kórsetýin pysyqtap jatyrmyz. Bul jobaǵa atsalysqan árbir aýyldasym «100 jańa esim» jeńimpazy atanýǵa laıyq. Bul baıqaýdaǵy meniń jeńisim – búkil aýylymnyń jeńisi», deıdi Ahat Raqyshev.
