Qasym-Jomart Toqaevqa Ombýdsmen ofısiniń quqyq qorǵaý qyzmeti baǵytynda atqaryp jatqan jumystary, onyń ishinde, Memleket basshysynyń tapsyrmasy boıynsha qabyldanǵan mańyzdy sheshimder jaıynda baıandaldy. Bul sheshimder azamattardyń quqyqtaryn qorǵaýdyń konstıtýsııalyq kepildigin odan ári nyǵaıtýǵa baǵyttalǵan.
Elvıra Ázimova Prezıdentke áıelderdiń, balalar men múmkindigi shekteýli jandardyń quqyqtaryn qorǵaý boıynsha zańnamalyq jáne atqarýshy deńgeılerde qabyldanatyn sharalar týraly aqparat berdi.
Kezdesý barysynda quqyq qorǵaý qyzmetimen aınalysatyn úkimettik emes uıymdardy qoldaýdy keńeıtý, qylmystyq zańnamany izgilendirý saıasatyn jalǵastyrý, sondaı-aq, Adam quqyqtary baǵytyndaǵy zań shyǵarý prosesine Ýákildi jáne azamattyq qoǵam ókilderin tartý jónindegi usynystar qaraldy.
Kezdesýde «Ombýdsmen týraly» zań qabyldaý jóninde aıtylyp, Ýákil ınstıtýtyna memlekettik qoldaý kórsetý jáne onyń áleýetin óńirler deńgeıinde nyǵaıtý máselesi talqylandy.
Prezıdent azamattardyń tikeleı qatysýymen qoǵamdyq baqylaý túrleriniń biri retinde 2014 jyly qurylǵan Azaptaýlar men qatygezdikti boldyrmaý boıynsha ulttyq aldyn alý tetiginiń qyzmetin jalǵastyrýdyń mańyzdylyǵyn atap ótti. Memleket basshysy azamattardyń buzylǵan quqyqtary men zańdy múddelerin qalpyna keltirýge járdemdesý qajettigin aıtyp, Úkimet ázirlegen «Qoǵamdyq baqylaý týraly» zań jobasy aıasynda qajetti sharalar qabyldaýdy tapsyrdy.
