«Eger osy is tolyqtaı qolǵa alynsa, aldaǵy bes jylda bul mamandyq ıelerine degen suranys azaıady. Alaıda ol úshin eń birinshi ákimdikterdiń qoldaýy qajet ári jergilikti bıýdjetterdiń múmkindikterine de qaraımyz», deıdi mınıstrlik ókili.
Qazirgi tańda elimiz boıynsha 3 myńǵa jýyq ýchaskelik polısııa beketi jumys isteıtin bolsa, onyń 700-ge jýyǵy qalalarda, al 2 myńnan astamy aýyl-aımaqtarda ornalasqan. Mınıstrliktiń jospary boıynsha jylyna 35 arnaıy mobıldi beket ashý da qolǵa alynǵan úlken bastamanyń biri. «Bul maqsatta IIM árbir óńirlik ákimmen yntymaqtastyq týraly tıisti memorandým jasasyp, birqatar aımaqta bul jospar naqty júzege asyrylyp ta keledi. Máselen bıyl Aqtóbe óńirinde – 5, Soltústik Qazaqstan oblysynda 2 stasıonarlyq polısııa beketi paıdalanýǵa berildi», deıdi bul jóninde A.Mılıýk.
Polısııanyń servıstik modelin engizýdiń basty ereksheligi shtat pen polısııa qurylymyn ońtaılandyrýǵa qatysty. Tártip saqshylarynyń áleýmettik jaǵdaıyn jaqsartý, polısııa qyzmetin baǵalaýdyń jańa krıterıılerin engizý jáne vedomstvolyq bilim berýdi jańǵyrtý – mine, halyqpen jumys isteýdiń jańa formattaryn talap etetin modeldiń basty kózdegeni osylar. «Al ulttyq servıstik modeldi damytýdaǵy úsh negizgi baǵytty bólip kórsetýge bolady, deıdi vedomstvo qyzmetkeri. – Birinshisi – qarapaıym halyq pen polısııanyń baılanysyn barynsha jeńildetý, azamattardyń habarlamalaryna jedel áreket etýge baǵyttalǵan qadamdyq qoljetimdilik. Ekinshisi – qaýip-qaterlerdi ýaqtyly joıý, quqyq buzýshylyqtardyń aldyn alý. Úshinshisi – halyqpen tyǵyz seriktestik ornatý. Sebebi qaýipsizdikti qamtamasyz etý máseleleri kóbine-kóp óńirlerde ózektiligin joımaı keledi».
Alaıda bir jaıtty aıta ketýimiz kerek. Elordada qanatqaqty jobany júzege asyrý aıasynda 2 myńnan astam turǵyn arasynda áleýmettik saýaldama júrgizilgen. Saýaldama kezinde suraqtarǵa jaýap bergen nursultandyqtardyń jartysyna jýyǵy, ıaǵnı 46 paıyzy ózderiniń ýchaskelik polısııa ınspektorlaryn tanymaıtyn bolyp shyqqan. Respondentterdiń tek 2 paıyzy ýchaskelik bekettiń nemese polısııa bóliminiń ornalasqan jeri týraly bilse, qala turǵyndarynyń jartysynan astamy kez kelgen quqyq buzýshylyq kezinde burynǵydaı 102 nómirin teretindikterin jasyrmaǵan.
«Dál osy jaǵdaı ekinshi bir máseleni týyndatyp otyr», deıdi A.Mılıýk. Onyń málimdeýinshe, qazirgi tańda polısııa departamentterindegi jedel basqarý ortalyqtarynyń júktemesi shamadan tys asyp ketken. Máselen, astanalyq JBO operatorlary kúnine 2,5 myńǵa deıin qońyraý qabyldaıtyn bolsa, bul habarlamalardyń shamamen 40 paıyzy polısııanyń quzyretine jatpaıtyn ótinishter. «Eger árbir ýchaskelik polısııa qyzmetkeri ózine tıesili aýmaqtaǵy turǵyndarymen tyǵyz qarym-qatynasta bolsa, jedel basqarý ortalyqtarynyń júktemesin kem degende eki esege azaıtýǵa bolar edi», degen spıker ýchaskelik polısııa qyzmetkerlerine PIK chattary arqyly tikeleı baılanysqa shyǵýǵa bolatynyn da eskertip ótti. Saýaldama qorytyndysy boıynsha 49 paıyz halyq polısııa qyzmetkerleriniń jumysyna kóńili tolmaıtyndyqtaryn aıtsa, 51-i kásibılikterin joǵary baǵalaǵan.
«Servıstik model – bul qoǵamdyq qaýipsizdikti qamtamasyz etýge qatysty máselelerdi sheshýde polısııa men qoǵamnyń tize qosyp qyzmet jasaýy degen sóz. Alaıda sheteldik tájirıbe bul modeldiń barlyq memleketterge kele bermeıtinin kórsetip otyr. Sol sebepti biz polısııanyń servıstik modelin óz elimizde engizý barysynda ulttyq mádenıet pen mentalıtetti, zańnamany, geografııa men resýrstyq múmkindikterdi eskeretin bolamyz», dep atap ótti A.Mılıýk.
