Aıtýly kúnge oraı, Taraz qalasy ákimdiginiń uıytqy bolýymen «Ardagerlerdi ardaqtaıyq» aksııasy aıasynda Uly Otan soǵysynyń ardagerlerin turǵylyqty meken-jaılaryna baryp quttyqtaý uıymdastyryldy. Búginde kóne shaharda 20 soǵys ardageri turady. Keshegi qan maıdanda Otan qorǵaǵan qaısar azamattardyń erligi urpaq jadyndaǵy óshpes ónege. Ardagerler de sonaý otty jyldarǵa sheginis jasap, basynan ótken aýyr kezeńder týraly áńgimelep berdi.
Is-shara barysynda ardagerlerdiń úıleriniń aýlalarynda №85395 áskerı bólimniń orkestriniń sherýi ótkizilip, soǵys jyldaryndaǵy áýender oryndaldy. Sondaı-aq, «Temirqazyq» volonterlyq qozǵalysynyń eriktileri ardagerlerge gúl shoqtaryn syılady. Uly Jeńis qarsańyndaǵy quttyqtaýlardy soǵys ardagerleri úlken qýanyshpen qarsy alyp, is-shara sońynda kelýshilerge alǵys bildirdi. Tarazdyqtar oq pen ottyń arasynan aman oralǵan maıdangerlerge laıyqty qurmet kórsetip, ardagerler de jas urpaqqa batasyn berdi. Atalǵan aksııa mereke kúnderi jalǵasyn tabatyn bolady.
Jambyl oblysy
