Eki «sarynyń» aıqasy

AQSh-tyń Tehas shtatynda ornalasqan Arlıngton qa­lasyndaǵy AT&T Stadium sta­dıo­nynda uıymdastyrylǵan jek­pe-jek «Kanelonyń» se­nimdi jeńisimen aıaqtaldy. 12 raýndqa josparlanǵan aıqastyń 8-raýndynda Sonderstiń qa­baǵy jarylyp, bir raýnd boıy bir kózben judyryqtasyp shyq­ty. Raýndaralyq úziliste dári­gerler brıtanııalyq boks­shyǵa jekpe-jekti ári qaraı jalǵastyrýǵa bolmaıtynyn aıtyp, bapkerlerine kezdesýdi osy jerden toqtatýǵa keńes berdi. Sóıtip meksıkalyq «sary bala» kezekti qarsylasyn merziminen buryn jeńip, ekinshi orta sal­maqtaǵy úsh birdeı belbeýdiń ıegeri atandy.

Jalpy, «Kanelo» da, Son­ders te qazaqstandyq boks jan­­­kúıerlerine óte jaqsy tanys. Birinshisi, Otandasymyz Gennadıı Golovkınmen eki ret sharshy alańda sheberlik baı­qasyp, bireýinde teń túsip, ekinshisinde tóreshilerdiń she­shimi boıynsha jeńip ketken.

Al ekinshisi, GGG-men orta salmaqtaǵy absolıýtti álem chempıony ataǵy úshin ótetin jekpe-jekke uzaq ýaqyt saýdalasyp, aqyr sońynda judyryqtasýdan bas tartyp, Golovkınniń tórt altyn belbeýdiń basyn qosa­myn degen armanyn joqqa shyǵarǵan-dy. Osyndaı se­bep­termen qazaqstandyq boks jan­kúıerleriniń ashýyn tý­dyrǵan eki boks­shy­nyń arasyndaǵy bul aıqas­ty meksıkalyq jáne brıtanııalyq jankúıerlerden keıin qazaqstandyqtar da ta­ǵatsyzdana kútken edi.

Jekpe-jek aldynda boks mamandary da, kásipqoı boks­ta óner kórsetip júrgen kánigi boksshylar da «Kanelonyń» jeńisine senimdi bolǵanymen, biraz sarapshy Sonderstiń bul jolǵy daıyndyǵy men jeńiske degen erekshe qulshynysyn jo­ǵary baǵalaǵan-tyn. Son­daı-aq Sonders jeńedi degenge brıtanııalyqtyń rıng uzyn­dyǵyn 7 metrge jýyq bolsyn dep qıǵylyq salýy da sebep bolsa kerek. О́ıtkeni Bıllı keń rıngte ózin sýda júzgen ba­lyqtaı erkin sezinetin jáne kóp qarsylasyn dál osyndaı rıngte oıqastap júrip op-ońaı jeńgenine jankúıerler talaı márte kýá bolǵan edi. Biraq bul joly Sonderske rıngtiń kólemi de kómektese almady. Brı­tanııalyqtyń degenine kóngen Alvares: «Rıngtiń kólemin stadıonmen birdeı qylsa da, sharshy alańda ony eshkim qut­qara almaıdy», degen bolatyn.

Jekpe-jektiń alǵashqy raýndyn barlaýmen ótkizip, qar­sylasynyń áleýetin baıqaǵan Saýl Alvares ádettegideı qal­ǵan bes raýndty tolyq Son­derstiń erkine berdi. Sebebi «Ka­­nelonyń» maqsaty – Son­derske kóp soqqy jasaýyna múm­kindik berip, shabýyldaǵan qarsylasyn sharshatyp alý edi. Al ózi qarymta shabýylǵa ıek artyp, tek jekpe-jektiń ekinshi bóliginde ǵana iske ki­risýdi kózdedi. Nátıjesinde, 6-raýndtan bastap Saýl qar­sylasyn soqqynyń astyna ala bastady. Dál osy raýndta «Kanelonyń» apperkottan, ıaǵnı ıektiń astynan jasaǵan aýyr soqqysy kózdegen jerine dóp tıip, Sondersti eseńgiretip jiberdi. Degenmen soqqyǵa tó­zimdi ekenin kórsetken brı­tanııalyq boksshy jyldam es jıyp úlgerdi. Keıingi eki raýndta da Alvares ústemdik tanytty. Sóıtip 8-raýndtan keıin Sonderstiń bapkerleri tóreshige shákirtiniń jekpe-jekti ári qaraı jalǵastyra almaıtynyn aıtyp, «Kanelonyń» jeńisin moıyndady. Osylaısha, 30 jekpe-jektiń barlyǵynda jeńiske jetip, onyń teń jartysyna jýyǵynda qarsylastaryn merziminen buryn tize búktirgen Sonders karerasyndaǵy al­ǵashqy jeńilisine ushyrady. Al «Kanelo» bolsa, kezekti kez­de­sýin merziminen buryn aıaq­tady.

Osy jekpe-jek aldynda Alvares jýrnalısterdiń «Go­lovkınmen úshinshi ret sharshy alańda jolyǵýyń múmkin be?», degen saýalyna: «Árıne, eger Gennadıı ekinshi orta sal­maqqa kóteriletin bolsa, men trı­logııaǵa qarsy emespin» degen bolatyn. Biraq Sondersti jeńip, ekinshi orta salmaqtaǵy úsh beldigin ıelengennen keıin meksıkalyq boksshyda ja­ńa maqsat paıda boldy. Ol endi osy salmaqtaǵy IBF bel­be­ýiniń chempıony amerı­ka­lyq Kalebo Plantomen (21-0, 12 KO) kezdesip, ekinshi orta sal­maqtaǵy absolıýtti álem chem­pıony atanbaq nıette.

Eger al­daǵy qyrkúıek aıynda «Ka­nelo» amerıkalyq boksshymen judyryqtasatyn bolsa, onda Golovkın ekeýiniń arasyndaǵy úshinshi jekpe-jek múlde uıym­dastyrylmaýy múmkin.