«Bıylǵy 4 aıdyń qorytyndysy boıynsha Qazaqstan ekonomıkasy ósý jolyna tústi. Qabyldanǵan sharalardyń arqasynda ekonomıkanyń, onyń ishinde, qyzmetter men taýarlar óndirisinde ósýdiń oń qarqyny qamtamasyz etildi. Osy jylǵy qańtar-sáýirdegi ulttyq óndiristiń ósý qarqyny 0,7 paıyzdy qurady. Ekonomıkanyń qalpyna kelý serpini óndiristiń barlyq salalarynda baıqaldy. Jalpy ishki ónimniń ósýine shıkizattyq emes sektor eń úlken úles qosty. Bıylǵy jylǵy 4 aıdyń nátıjesi boıynsha óńdeý ónerkásibinde ósý 7,7 paıyzdy qurady. Bul – sońǵy 10 jyldaǵy eń joǵary ósim qarqyny», dedi Úkimet basshysy.
Asqar Mamın sondaı-aq mashına jasaýda 20,6 paıyz, onyń ishinde avtomobıl jasaýda 25,4, lokomotıvter men vagondar óndirisinde 49,7, elektr quraldarynyń óndirisinde 10,2, kompıýterler, elektrondy jáne optıkalyq quraldar óndirisinde 52,3 paıyz dengeıinde joǵary ósý qarqyny baıqalǵanyn aıtty.
Sondaı-aq óńdeý sektorynda hımııa ónerkásibi, jeńil ónerkásip, onyń ishinde kıim óndirisi; metallýrgııa, onyń ishinde tústi jáne qara metallýrgııa; tamaq ónimderi, farmasevtıka jáne munaı óńdeý sııaqty salalar joǵary serpin kórsetti.
Qurylys sektorynda qurylys materıaldarynyń óndirisin 26,5, qurylysty 12,5 jáne turǵyn úıdi paıdalanýǵa berýdi 13,3 paıyz nemese 3,5 mln sharshy metrdi qosa alǵanda, ósýdiń joǵary qarqyny qamtamasyz etildi. Aýyl sharýashylyǵynda ósý qarqyny 3 paıyzdy qurady.
«Salanyń tartymdylyǵy ósýiniń arqasynda negizgi kapıtalǵa salynǵan ınvestısııa – aýyl sharýashylyǵy men tamaq ónimderiniń óndirisinde 50 paıyzdan astam artty. Taý-ken óndirisin esepke almaǵanda, ekonomıkada negizgi kapıtalǵa salynǵan ınvestısııa 32,3 paıyzǵa ósti. Ekonomıka ósiminiń asa mańyzdy faktorlarynyń biri – qyzmet kórsetý sektoryndaǵy oń dınamıka boldy. Saýda, baılanys, jyljymaıtyn múlikpen operasııalar, qarjy jáne saqtandyrý qyzmeti sııaqty kórsetiletin qyzmetter salalarynda oń ósý qarqyny baıqalady», dedi Asqar Mamın.
