Qala boıynsha saýda ortalyqtary men saýda keshenderindegi pýnktter sany – 9. Olar – Mega Silk Way, Keruen, «Han Shatyr» jáne «Abý-Dabı Plaza» saýda oıyn-saýyq ortalyqtary, «Azııa Park» jáne «Bıg Shanhaı» saýda keshenderi, Ortalyq bazar, «Álem» jáne «Artem» saýda ortalyqtary. Atalǵan egý aımaqtarynda shamamen 14 myń azamat vaksına alǵan.
Halyqtyń jappaı vaksına alýy qalypty tirshiligimizge oralýdyń birden-bir joly ekeni anyq. Al jurttyń túgel vaksına alyp, saqtanǵanynsha qaýipsizdik erejelerin qatań ustanǵan abzal. Degenmen Nur-Sultan qalasy «qyzyl aımaqta» ekenin bilse de, karantın rejimin qaperine ilmeı, kásibin dóńgeletip jatqan kásiporyndar sany azaımaı tur. Elordadaǵy monıtorıngtik toptar karantın rejimin saqtaý turǵysynan kásipkerlik obektilerinde tekserý júrgizip keledi. Eskertý berilip, jaýapkershilikke tartylǵanyna qaramastan qalanyń keıbir mekemeleri karantındik shekteýlerdi udaıy buzýda. Merekelik demalys kúnderiniń birinde karantındik tyıymdarǵa qaramastan Saryarqa aýdanynda ornalasqan «Gaýhartas» meıramhanasynda 100-ge jýyq adamǵa arnap aýyzashar ótkizildi.
Sol sııaqty 9 mamyr kúni taǵy bes mekeme karantın talaptaryn buzǵany anyqtaldy. Ashyq jobasyna qatysatyn Line Brew meıramhanasy tyıym salynǵanyna qaramastan tún ortasynan keıin de jumys istedi. Sondaı-aq elordanyń sanıtarlyq dárigeriniń qaýlysyn buzǵany úshin «Palaý ortalyǵy» ashanasy, «Bazılık» jáne «Panachı» meıramhanalary ákimshilik jaýapkershilikke tartyldy. Bul mekemeler demalys kúni de toqtaýsyz jumys istedi. Demalys kúni jumys isteý sanıtarlyq dárigerdiń qaýlysy boıynsha ruqsat etilmegen. Karantın rejimi sol sııaqty Yamato oıyn klýbynda da buzyldy.
Almaty aýdanynda «Tapchan» jáne «Beles» kafeleri jumys rejimin buzǵany úshin jaýapkershilikke tartyldy. Demalys kúnderi anyqtalǵan buzýshylyqtar boıynsha materıaldar tıisti sharalar qabyldaý jáne kásipkerlerdi jaýapkershilikke tartý úshin aýdandyq sanıtarlyq-epıdemııalyq baqylaý basqarmalaryna jiberildi.
Esterińizge sala keteıik, Nur-Sultan epıdemııalyq ahýaldy baǵalaý matrısasy boıynsha eki aıdan beri «qyzyl aımaqta» tur. Qaladaǵy jaǵdaı áli de turaqsyz bolyp otyr. Jaǵdaıdyń nasharlaýyna jol bermes úshin qala turǵyndary men qonaqtary, sondaı-aq kásipkerlik sýbektileri sanıtarlyq normalardy qatań saqtaýy, dárigerler men epıdemıologterdiń usynystaryn oryndaýy tıis.
Qazirgi ýaqytta qaýipti vırýspen kúresýdiń jalǵyz tıimdi ádisi ujymdyq ımmýnıtetti damytý bolyp sanalady. Bul halyqty jappaı vaksınalaý jaǵdaıynda ǵana múmkin. Qalada bul úshin tıisti jaǵdaıdyń bári jasalǵan.
