Buǵan deıin bir lekti – 153 jandy Qazaqstanǵa attandyryp salyp, ózderine keler jaqsy kúndi kútip keıin qalǵan 256 aǵaıyn Mańǵystaý topyraǵyna taban tiredi. «Túrikmendemırallary» memlekettik agenttigi arqyly mamyr aıynyń 12-i kúni Túrikmenbashy stansasynan poıyzǵa otyrǵan aǵaıyndar 13 mamyrda shekaradan beri ótip Qazaqstannyń «Bolashaq» stansasyna, odan keıin «Jańaózen» qalasyna kelip toqtady. Bul qýanysh Qazaqstan Respýblıkasy Syrtqy ister, Aqparat jáne qoǵamdyq damý, sondaı-aq Densaýlyq saqtaý mınıstrlikteri jáne UQK Shekara qyzmeti, ózge de quzyrly oryndar men uıymdardyń uıymdastyrýy, qoldaýy arqyly júzege asqan bolatyn.
Álemde oryn alyp jatqan indet jaǵdaıyna baılanysty kútip alý sharasy barlyq sanıtarlyq talaptarǵa sáıkes ótkizildi jáne medısınalyq, polıseılik, kommýnaldyq, transporttyq qyzmettermen qamtamasyz etildi. Kelgen qandastardyń ekeýiniń temperatýrasy 38.2 bolǵandyqtan, jedel járdem qyzmetkerlerimen provızorlyq ortalyqqa jetkizildi. Dárigerlerdiń tekserýimen bul eki adamda COVID jáne pnevmanııa belgileri bolmaǵandyqtan úılerine qaıtaryldy. Jańaózen temir jol vokzalynan án-kúımen, shashýmen saltanatty jaǵdaıda qarsy alǵan uıymdastyrýshylar da, ortaǵa oralǵan baýyrlar da máz.
Qandastardyń qalaýy boıynsha 66 adamnan turatyn 18 otbasy Jańaózen qalasyna, 105 adamy bar 30 otbasy Aqtaý qalasyna, 53 múshesi bar 14 otbasy Munaıly aýdanyna qonys tepse, 8 adamy bar úsh otbasy Almaty oblysyna, 14 adamy bar 5 otbasy Jambyl oblysyna qaraı kósh betin burmaq.
«Elge el qosylsa – qut» degendeı, qandastardyń atajurtqa oralýy – olar úshin ǵana emes, biz úshin de úlken qýanysh.
Mańǵystaý oblysy
