Konferensııany ashyp mártebeli bas qosýdyń mańyzy jaıly aıtqan Elbasy kitaphanasynyń dırektory Baqytjan Temirbolat myrza, elimiz Táýelsizdiginiń 30, Qazaqstandaǵy Máskeý memlekettik ýnıversıteti fılıalynyń qurylǵanyna 20 jyl tolǵan mereıli kezeńde ótkizilip otyrǵan atalǵan jıyn, ulttyq sanany túrki oıshyldarynyń rýhanı murasy arqyly jańǵyrtý joldaryn tabýdy, qoǵamdyq-saıası kózqarastyń injý-marjanyn saralaýdy, Qazaqstan halyqtarynyń basyn qosyp, birligin kúsheıtetin qundylyqtar men ıdeıalardy ortaǵa salýdy kózdeıdi dedi.
Odan keıin sóz tizgini tıgen elordaǵa M.Lomonosov atyndaǵy MMÝ fılıalynyń dırektory Aleksandr Sıdorovıch eń áýeli Máskeýdegi M.Lomonosov atyndaǵy MMÝ rektory Vıktor Sadovnıchııdiń úndeýin oqyp, tanystyrdy. Sondaı-aq ol Qazaqstannyń Tuńǵysh Prezıdenti men Máskeý ýnıversıtetiniń qarym-qatynasy jaıly tolǵap, N.Nazarbaevtyń MMÝ-de oqyǵan dáristerinen úzindi keltirip, onyń kemel mańyzy jaıly aıtyp: «Tarıhtyń qalyptasýyna eńbegin sińirgen azamattar ǵana ony tereń túsine alady. Sol sebepti búgingi Qazaqstannyń qalyptasýy men damýyna úles qosqan memleket jáne qoǵam qaıratkerleriniń atalǵan konferensııaǵa qatysyp otyrǵany aıryqsha mańyzdy. Bul kisiler – Nursultan Nazarbaevtyń jetekshiligimen túrli salany basqarǵan parasatty jandar», dedi ol.
Bas qosý barysynda L.N.Gýmılev atyndaǵy EUÝ men M.V.Lomonosov atyndaǵy MMÝ qazaqstandyq fılıalynyń professory Jabaıhan Ábdildın «Memleket Táýelsizdiginiń 30 jyldyǵy – taǵdyrsheshti máselelerdiń órleýi men sheshimi» taqyrybynda baıandama jasap, Qazaqstannyń egemendikke qol jetkizýi – úlken baqyt. Táýelsizdiktiń arqasynda týǵan tilimiz jańǵyryp, memlekettik shekaramyz bekidi, ekonomıkamyz kóterilip, ulttyq valıýtamyz ben jeke áskerimiz paıda boldy. Nursultan Nazarbaevtyń jasampazdyǵy arqasynda qysqa merzimniń ishinde tájirıbelik ıdeıalar men bastamalar kóterildi. Máselen, olardyń birine sáıkes Eýrazııa ekonomıka odaǵy búginde belsendi damyp jatqan uıymdar óte kóp, – dese akademık aqsaqal, belgili qoǵam jáne memleket qaıratkeri, saıası ǵylymdarynyń doktory, professor Qýanysh Sultanov MMÝ-diń qazaqstandyq fılıaly Qazaqstan men Reseı arasyndaǵy rýhanı-gýmanıtarlyq qarym-qatynastyń sımvoly ekenine toqtaldy.
Qazaqstan halqy Assambleıasy tóraǵasynyń orynbasary Marat Ázilhanov memlekettiń beıbit damýyna kepil bolǵan Elbasy bastamasyna toqtala otyryp, táýelsizdik jyldary Elbasy men Qazaqstan halqynyń birlikke baǵyttalǵan ultaralyq qarym-qatynas modeli qalyptasty, bul model memleketimizdiń tarıhı erekshelikterine negizdelgen, etnostyq, konfessııalyq, tildik, mádenı sanalýandyq qoǵamymyzdyń irgetasyn qalap, teńdessiz baılyǵymyzǵa aınaldy. Sondyqtan da ult tutastyǵy memleketimizdiń mańyzdy qundylyǵyna jatady, – dedi.
Prezıdent janyndaǵy Qazaqstan strategııalyq zertteýler ınstıtýtynyń dırektory Zarema Sháýkenova «Qazaqstan Táýelsizdiginiń 30 jyldyǵy: jaýapty kóshbasshylyq, turaqtylyq, sabaqtastyq» atty baıandamasynda: «Egemen memleket retinde Qazaqstannyń negizgi jeńisi – shektes memlekettermen shekarasyn bekitip alýynda. Jaýapty da iri istiń nátıjesinde shekaranyń 14 myń shaqyrymy mejelenip, Kaspıı teńiziniń buryn-sońdy bolmaǵan quqyqtyq mártebesi týraly konvensııaǵa kórshiles elder basshylarynyń qoly qoıyldy. Búginde Qazaqstannyń aýmaǵyna qatysty eshqandaı narazylyq ta, daý da joq. Shekaramyzdyń álem moıyndaǵan halyqaralyq quqyǵy bar» dese, «Postkeńestik keńistiktiń ıntegrasııalyq prosessterindegi táýelsiz Qazaqstannyń orny men róli» taqyrybynda Reseı memlekettik gýmanıtarlyq ýnıversıtetiniń prezıdenti Efım Pıvovar myrza: «Qazaqstan – postkeńestik keńistiktegi táýelsiz damýdyń úlgili jobasy. Bul – parasatty saıasattyń jemisi. Osy tusta N.Á.Nazarbaev pen Q.K.Toqaevtyń eńbegin aıtpaı ketý múmkin emes. Bul jeńiske Qazaqstan halqynyń qosqan úlesi zor. MMÝ-diń tarıhshy professory retinde 20 jyldaı ýaqyt boıy Qazaqstanda ýnıversıtetimizdiń fılıaly abyroıly qyzmetin jalǵastyryp jatqanyn maqtan tutamyn», dedi.
Konferensııanyń plenarlyq otyrysyna qoǵam qaıratkeri Qaıyrbek Súleımenov «Qazaq memlekettiginiń mańyzdy elementi – quqyq júıesiniń qalyptasýy men damýy» taqyrybynda, M.V.Lomonosov atyndaǵy MMÝ Azııa jáne Afrıka elderi ınstıtýtynyń Ortalyq Azııa jáne Kavkaz elderi kafedrasynyń meńgerýshisi Jibek Syzdyqova «Qazaqstan men Reseı – eýrazııalyq ıntegrasııanyń ózegi» taqyrybynda baıandama jasasa, kelesi kezekte saıası belsendi tulǵa Ermuhamet Ertisbaev, Qazaqstan Respýblıkasy Prezıdenti arhıviniń dırektory Jámıla Ábdiqadyrova, Qazaqstan Respýblıkasy Bilim jáne ǵylym mınıstrligi Ǵylym komıtetiniń Memleket tarıhy ınstıtýty dırektory Erkin Ábil qatarly tulǵalar óz oı-pikirlerin ortaǵa saldy.
